مزیدار مزاحیہ شاعری

یہ محفل سخن تھی مئی کے مہینے میں
شاعر سبھی نہائے ہوئے تھے پسینے میں
زندہ رہیں گے حشر تک ان شاعروں کے نام
جو اس مشاعرہ میں سنائے گئے کلام


صدر مشاعرہ کہ جناب خمارؔ تھے
بیکس تھے بے وطن تھے غریب الدیار تھے
ماہرؔ تھے بے قرار تو احقرؔ تھے بد حواس
کوثرؔ پکارتے تھے کہ پانی کا اک گلاس


شوقؔ و نشورؔ و ساحرؔ و شاعرؔ فگارؔ و رازؔ
اک مقبرہ میں دفن تھے جملہ شہید ناز
ایسا بھی ایک وقت نظر سے گزر گیا
جب صابریؔ کے صبر کا پیمانہ بھر گیا


یہ میہماں تھے اور کوئی میزباں نہ تھا
ان ''آل انڈیوں'' کا کوئی قدرداں نہ تھا
گرمی سے دل گرفتہ نہ تھا صرف اک امیرؔ
کتنے ہی شاعروں کا وہاں اٹھ گیا خمیر


رو رو کے کہہ رہا تھا اک استاد دھامپور
''مارا دیار غیر میں مجھ کو وطن سے دور''
القصہ شاعروں کی وہ مٹی ہوئی پلید
شاعر سمجھ رہے تھے کہ ہم اب ہوئے شہید


وہ شاعروں کا جم غفیر ایک ہال میں
دم توڑتے ہوں جیسے مریض اسپتال میں
وہ تشنگی وہ حبس وہ گرمی کہ الاماں
منہ سے نکل پڑی تھی اک استاد کی زباں


شاعر تھے بند ایک سنما کے حال میں
پنچھی پھنسے ہوئے تھے شکاری کے جال میں
وہ پیاس تھی کہ جام قضا مانگتے تھے لوگ
''وہ حبس تھا کہ لو کی دعا مانگتے تھے لوگ''


موسم کچھ ایسا گرم کچھ اتنا خراب تھا
شاعر جو بزم شعر میں آیا کباب تھا
بزم سخن کی رات قیامت کی رات تھی
ہم شاعروں کے حق میں شہادت کی رات تھی


کچھ اہل ذوق لائے تھے ساتھ اپنے تولیا
ننگے بدن ہی بیٹھے تھے کچھ پیر و اولیا
پاجامہ و قمیص نہ آیا بدن کو راس
بیٹھے تھے لوگ پہنے ہوئے قدرتی لباس


کیسے کہوں وہ اہل ادب بے وقوف تھے
اتنا ضرور ہے کہ وہ موسم پروف تھے
گرمی سے مضطرب تھے یہ شاعر یہ سامعین
کہتے تھے ہم پہ رحم کر اے رب عالمین


یہ آخری گناہ تو ہو جائے در گزر
اب ہم مشاعرہ میں نہ جائیں گے بھول کر
یہ ہوش کس کو تھا کہ وہاں کس نے کیا کیا
سب کو یہ فکر تھی کہ ملے جلد خوں بہا


حالانکہ جان بچنے کی صورت نہ تھی کوئی
حکم خدا کہ اپنی قضا ملتوی ہوئی

کہوں تو کیا میں کہوں پیاری پیاری آنکھوں کو
سبو کہوں کہ صراحی تمہاری آنکھوں کو
کچھ ایسا چھایا ہے دل پر مرے غبار الم
گلوں کے سائے بھی لگتے ہیں بھاری آنکھوں کو


جھلک رہے ہیں وہ پلکوں پہ آنسوؤں کی طرح
وہ غم جو تم نے دئیے ہیں ہماری آنکھوں کو
جھکیں جو پلکیں تو رک جائیں دھڑکنیں دل کی
اٹھیں تو چوم لیں تارے تمہاری آنکھوں کو


لہو گلوں کا بہا ہے بصورت آنسو
خزاں نے لوٹا ہے جب بھی ہماری آنکھوں کو
دعائیں کرتے ہیں نرگس کے پھول گلشن میں
نظر لگے نہ کسی کی تمہاری آنکھوں کو


سلگتی رات کے سینے پہ برف سی رکھ دی
غزل میں ڈھال کے گویا تمہاری آنکھوں کو
مہکتے پھول سنکتی ہوا یہ موسم گل
چمن میں دیکھتے ہیں سب تمہاری آنکھوں کو

تصویر آج دیکھ کے عہد شباب کی
اتنا ہنسا کہ آنکھ سے آنسو نکل پڑے

رحیم اللہ ہوا اچھا تو اس نے
یہ دیکھا ہو چکی ہے ''پارٹیشن''
گئے کچھ بھاگ اور کچھ مر چکے ہیں
نہ نیتا سنگھ باقی ہے نہ بھیشن


سنے اس داستاں کے جب فسانے
تو غصے نے بنایا اس کو مجنوں
تڑپ اٹھا کہ لے کیسے وہ بدلہ
پیے ان کافروں کا کس طرح خوں


نہ کیوں کہلا سکا وہ مرد غازی
نہ جب یہ مل سکا وہ خوب رویا
یکا یک اس کے سب پلٹے خیالات
تو اس نے دامن اسلام چھوڑا


کنارہ کش ہوا سب بھائیوں سے
نئے مذہب سے رشتہ اپنا جوڑا
کئی دن بعد جب نکلا وہ گھر سے
تو اس کے منہ پہ داڑھی سر پہ تھے بال


نہالا سنگھ اب تھا نام اس کا
لیے کرپان وہ غصے سے تھا لال
ہزاروں خوں فشاں ارمان لے کے
کھڑا تھا آج وہ مسجد کے آگے


پکڑنے کے لیے اس کو نمازی
نمازیں چھوڑ کر مسجد سے بھاگے
لگا کر ایک نعرہ وحشت آلود
وہی کرپان جھٹ اس نے نکالی


لگا کر قہقہہ پھر اک فلک رس
معاً سینے میں اپنے گھونپ ڈالی
تمنا تھی کہ اک سکھ میں بھی ماروں
یہ پوری تو نے کی اللہ تعالی


بہت خوش ہوں رحیم اللہ خاں نے
نہالا سنگھ جی کو مار ڈالا

غالبؔ نے کی یہ عرض خداوند ذو الجلال
جنت سے کچھ دنوں کے لیے کر مجھے بحال
مہ وش مرے کلام کو سازوں پہ گائے ہیں
قسمت نے بعد مرنے کے کیا دن دکھائے ہیں


شاعر جو منحرف تھے وہ مرعوب ہو گئے
ایواں جو میرے نام سے منسوب ہو گئے
خادم کا اس ادارے سے رشتہ ہے باہمی
اک بار میں بھی دیکھ لوں غالب اکادمی


ہر شخص کے حضور میں پھیلائے ہات تھا
نا قدریوں کے دور میں فدوی حیات تھا
حکم خدا ہوا کہ ذرا جلد جائیے
دنیا کو جا کے پھر سے ذرا دیکھ آئیے


ساغرؔ بہ احترام خدا کے وکیل نے
دلی میں لا کے چھوڑ دیا جبرئیل نے
اک ساتھ دو بسیں جو بھنا بھن گزر گئیں
حوروں نے جو سنواری تھیں زلفیں بکھر گئیں


کاندھے سے کاندھا مار کے مہ وش نکل گیا
اولی سے ثانی شعر کا میٹر بدل گیا
بیٹھے جو بس میں اور ہوئے ہوش باختہ
جنت کی سمت اڑتی نظر آئی فاختہ


جھٹکے سے بس کے ریشمی پوشاک پھٹ گئی
جھرمٹ میں لڑکیوں کے تھے اور جیب کٹ گئی
دیکھا جو ہپیوں کو تو دل شاد ہو گئے
سمجھے کہ قیدی قید سے آزاد ہو گئے


خفیہ پولس بھی عادت و اطوار دیکھ کر
پیچھے لگی تھی جبہ و دستار دیکھ کر
غالبؔ کی جو نگاہ ادھر سے ادھر گئی
اردو کی اک کتاب نظر سے گزر گئی


اردو کے زر نگار کسی آفتاب نے
طوطے کو ''ت'' سے لکھا تھا خانہ خراب نے
غالبؔ یہ سمجھے یار کہیں پوپلا نہ ہو
تصنیف کرنے والا کہیں توتلا نہ ہو


یہ داغ دھل سکیں گے نہ اشکوں کے دھوئے سے
تا عمر میں نے لکھا ہے طوطے کو ''ط'' سے
واللہ بے بلائے براتی سے ہو گئی
غالبؔ کی بھینٹ ایک صحافی سے ہو گئی


بولے بڑے وقار سے غالبؔ ہے میرا نام
جنت سے ساتھ آئے ہیں جبریل ذی مقام
بولے کہ کتنے لوگوں پہ غالبؔ کا بھوت ہے
ہیں آپ واقعی کوئی اس کا ثبوت ہے


بے نور جو چراغ ہیں وہ آفتاب ہیں
کس کس کو ہم بتائیں کہ غالبؔ جناب ہیں
واللہ جھوم جائے گی دنیا حضور کی
جنت سے ساتھ لایا ہوں تصویر حور کی


تصویر دیکھ کر کہا سنئے بڑے میاں
اس شکل کی ملیں گی ہزاروں ہی لڑکیاں
حوروں سے گاہ گاہ جو خط میں نے پائے ہیں
جبریل اپنے ساتھ وہ سب لے کے آئے ہیں


خط پڑھ کے بولے واہ یہی خط ہیں کیا جناب
جن میں نہ سوز و ساز نہ شکوے نہ اضطراب
یہ خط بھی پڑھ کے دیکھیے جو میرے پاس ہیں
حوروں سے بڑھ کے لڑکیاں یاں ایڈوانس ہیں


ہر آرزوئے دل کو بہ تصویر لکھتی ہیں
ماتا پتا کو پاؤں کی زنجیر لکھتی ہیں
آئے تھے چار روز کو جلدی گزر گئے
غالبؔ وفور شرم سے دو دن میں مر گئے


پوچھا خدا نے حال تو غالبؔ نے یہ کہا
جنت سے اب نہ جائے گا یہ بندۂ خدا
جینا زمانے والوں نے دشوار کر دیا
پہچاننے سے بھی مرے انکار کر دیا


آئی صدائے حق کہ یہی بند و بست ہیں
تیرے وطن کے لوگ تو مردہ پرست ہیں

لہنگاؔ سنگھا کلمہ پڑھ
لاالہ آگے پڑھ
آگے آپ بتا دیجے
میری جان بچا لیجے


آگے مجھے اگر آتا
تم سے میں کیوں پڑھواتا
سوچ نہ اب بیکار رحیمؔ
مار اس کو تلوار رحیم


دور ہوں اس کے سب دکھڑے
کر دے اس کے دو ٹکڑے

شیخ صاحب کی نصیحت بھری باتوں کے لئے
کتنا رنگین جواب آپ کی انگڑائی ہے

اب کے بیگم مری میکے سے جو واپس آئیں
ایک مرغی بھی بصد شوق وہاں سے لائیں
میں نے پوچھا کہ مری جان ارادہ کیا ہے
تن کے بولیں کہ مجھے آپ نے سمجھا کیا ہے


ذہن نے میرے بنائی ہے اک ایسی سکیم
دنگ ہوں سن کے جسے علم معیشت کے حکیم
آپ بازار سے انڈے تو ذرا دوڑ کے لائیں
تاکہ ہم جلد سے جلد آج ہی مرغی کو بٹھائیں


تین ہفتوں میں نکل آئیں گے چوزے سارے
تو سہی آپ کو پیار آئے وہ پیارے پیارے
چھ مہینے میں جواں ہو کے وہی مرغ بچے
نسل پھیلاتے چلے جائیں گے دھیرے دھیرے


دیکھ لیجے گا بہ تائید خدائے دانا
پولٹری بنے گا مرا مرغی خانہ
پولٹری فارم میں انڈوں کی تجارت ہوگی
دور عسرت اسی مرغی کی بدولت ہوگی


میں وہ عورت ہوں کہ حکمت مری مردوں کو چرائے
انہیں پیسوں سے خریدوں گی میں کچھ بھینسیں اور گائے
ڈیری فارم بنے گا وہ ترقی ہوگی
جوئے شیر آپ ہی انگنائی میں بہتی ہوگی


عقل کی بات بتاتی ہوں اچنبھا کیا ہے
دودھ سے آپ کو نہلاؤں گی سمجھا کیا ہے
بچے ترسیں گے نہ مکھن کے لئے گھی کے لئے
آپ دفتر میں نہ سر ماریں گے دفتر کے لئے


میرے خوابوں کے تصدق میں بشرط تعمیل
چند ہی سال میں ہو جائے گی دنیا تبدیل
سحر تدبیر کا تقدیر پہ چل جائے گا
جھونپڑا آپ کا کوٹھی میں بدل جائے گا


الغرض ہوتی رہی بات یہی تا سر شام
نو بجے رات کو سونے کا جو آیا ہنگام
سو گئیں رکھ کے حفاظت سے اسے زیر پلنگ
خواب میں آتی رہی نشۂ دولت کی ترنگ


سن رہی تھی کوئی بلی بھی ہماری باتیں
پیاری بیگم کی وہ دلچسپ وہ پیاری باتیں
رات آدھی بھی نہیں گزری تھی کہ اک شور مچا
چیخ مرغی کی سنی نیند سے میں چونک پڑا


آنکھ ملتا ہوا اٹھا تو یہ نقشہ پایا
اس بچاری کو صحنچی میں تڑپتا پایا
دانت بلی نے گڑائے تھے جو گردن کے قریب
مر گئی چند ہی لمحوں میں پھڑک کر وہ غریب


صبح کے وقت غرض گھر کا یہ نقشہ دیکھا
چہرہ بیگم کا کسی سوچ میں لٹکا دیکھا
روٹی بچوں نے جو مانگی تو دو ہتھڑ مارا
اسے گھونسہ اسے چانٹا اسے تھپڑ مارا

عورت کو چاہئے کہ عدالت کا رخ کرے
جب آدمی کو صرف خدا کا خیال ہو

اٹھے کہاں بیٹھے کہاں کب آئے گئے کب
بیگم کی طرح تم بھی حسابات کرو ہو

میں ٹیوٹر تھا میں گھر گھر پڑھاتا پھرتا تھا
مدرسی کی بندریا نچاتا پھرتا تھا
کہیں میں صوفے پہ بیٹھا کہیں چٹائی پر
کہیں ٹکایا گیا کھری چارپائی پر


کہیں سے نکلا کسی لعل کی پٹائی پر
کسی عزیز نے ٹرخا دیا مٹھائی پر
میں ٹیوٹر تھا میں گھر گھر پڑھاتا پھرتا تھا
مدرسی کی بندریا نچاتا پھرتا تھا


نہ کوئی شام مری اپنی شام ہوتی تھی
کہ میری شام تو بچوں کے نام ہوتی تھی
پہ جب کسی کی ممی ہم کلام ہوتی تھی
تو میرے علم کی ترکی تمام ہوتی تھی


میں ٹیوٹر تھا میں گھر گھر پڑھاتا پھرتا تھا
مدرسی کی بندریا نچاتا پھرتا تھا
جو چھوٹا بھائی بھی شاگرد کا کوئی ہوتا
تو وہ بھی آن کے میری ہی گود میں سوتا


بڑے کے پٹنے پہ چھوٹا جو پھوٹ کر روتا
میں شیروانی کے دھبوں کو دیر تک دھوتا
میں ٹیوٹر تھا میں گھر گھر پڑھاتا پھرتا تھا
مدرسی کی بندریا نچاتا پھرتا تھا


ہر اک قماش کے بچے پڑھا دیے میں نے
متاع علم کے نلکے لگا دیے میں نے
جو کھوٹے سکے تھے وہ بھی چلا دیے میں نے
جو اے ایس ایس تھے سی ایس ایس بنا دیے میں نے


میں ٹیوٹر تھا میں گھر گھر پڑھاتا پھرتا تھا
مدرسی کی بندریا نچاتا پھرتا تھا
نہ قدر داں نہ کوئی صاحب نظر پایا
نہ گھاٹ ہی کا رہا میں نہ کوئی گھر پایا


خطاب پایا تو سوکھا سڑا سا ''سر'' پایا
میں اپنی قوم کے بچے پڑھا کے بھر پایا
میں ٹیوٹر تھا میں گھر گھر پڑھاتا پھرتا تھا
مدرسی کی بندریا نچاتا پھرتا تھا

میرے دوست کے چار عدد جو بچے ہیں
عقل کے یوں تو چاروں ہی کچھ کچے ہیں
لیکن بعضی بات ایسی کہہ جاتے ہیں
اماں باوا حیرت میں رہ جاتے ہیں


اک دن بولے آ کر اپنے ابو سے
ہم میں سے دو کون سے والے ہیں اچھے
ان کو تو اسکول میں داخل کروا دیں
دو کو واپس اللہ کے گھر پہنچا دیں


بلکہ چاروں ہی کو واپس کروا دیں
اور امی کو بہبودگی میں لگوا دیں
گھر میں جب دو دو تنخواہیں آئیں گی
آپ کی جیبیں نوٹوں سے بھر جائیں گی


امی کا بھی موڈ اچھا ہو جائے گا
ٹی وی کا بھی دل ٹھنڈا ہو جائے گا

شیخ آئے جو محشر میں تو اعمال ندارد
جس مال کے تاجر تھے وہی مال ندارد
کچھ ہوتا رہے گا یوں ہی ہر سال ندارد
تبت کبھی غائب کبھی نیپال ندارد


رومال جو ملتے تھے تو تھی رال ندارد
اب رال ٹپکتی ہے تو رومال ندارد
تحقیق کیا ان کا جو شجرہ تو یہ پایا
کچھ یوں ہی سی ننھیال ہے ددھیال ندارد


ہے اس بت کافر کا شباب اپنا بڑھاپا
ماضی ہے ادھر گول ادھر حال ندارد
تعداد میں ہیں عورتیں مردوں سے زیادہ
قوالیاں موجود ہیں قوال ندارد


بیوی کی بھی جوتی کے تلے ہو گئے غائب
شوہر کے اگر سر سے ہوئے بال ندارد

''دل میں اک لہر سی اٹھی ہے ابھی''
اک غزل میں نے بھی کہی ہے ابھی
چھوڑ دوں میں ابھی وزارت کیوں
اک تجوری فقط بھری ہے ابھی


چور ڈاکو پہنچ گئے پہلے
جبکہ بستی نہیں بسی ہے ابھی
بینک سے لی تھی لیز پر گاڑی
بیچ کر قسط اک بھری ہے ابھی


چھوڑ سکتی نہیں ابھی وہ مجھے
ایک کوٹھی مری بچی ہے ابھی
جاگ جائے گی قوم بھی اک دن
''غم نہ کر زندگی پڑی ہے ابھی''

مرا پڑوسی کوئی مال دار تھوڑی ہے
یہ کار بینک کی ہے اس کی کار تھوڑی ہے
ہر ایک ملک میں جائیں گے کھائیں گے جوتے
کہ بزدلوں میں ہمارا شمار تھوڑی ہے


خدا کا شکر ہے چکر کئی سے ہیں اپنے
بس ایک بیوی پہ دار و مدار تھوڑی ہے
گلے میں ڈال کے باہیں سڑک پہ گھومیں گے
ہے نقد عشق ہمارا ادھار تھوڑی ہے


ہمارا پیار جو قاضی نکاح تک پہونچے
ہمارے بیچ کوئی اتنا پیار تھوڑی ہے''
جو فون بند رکھوں کال نہ اٹھاؤں میں
کسی کے باپ کا مجھ پہ ادھار تھوڑی ہے

صدر صاحب چار ماہ دو روز کی رخصت میں ہیں
اور بظاہر وہ پشاور میں ابھی فرصت میں ہیں
ان کو لیلیٰ کی صدارت کی جدائی کا ہے غم
گھر سے باہر کیسے نکلیں وہ ابھی عدت میں ہیں

کسمسانے کی اجازت نہیں دی جائے گی
بلبلانے کی اجازت نہیں دی جائے گی
ایک رقاص نے گا گا کے سنائی یہ خبر
ناچ گانے کی اجازت نہیں دی جائے گی


اس سے اندیشۂ فردا کی جوئیں جھڑتی ہیں
سر کھجانے کی اجازت نہیں دی جائے گی
اس سے تجدید تمنا کی ہوا آتی ہے
دم ہلانے کی اجازت نہیں دی جائے گی


اس کے رخسار پہ ہے اور ترے ہونٹ پہ تل
تلملانے کی اجازت نہیں دی جائے گی
یہ شریعت کا نہیں گیس کا بل ہے بیگم
بلبلانے کی اجازت نہیں دی جائے گی

پروفیسر ہی جب آتے ہوں ہفتہ وار کالج میں
تو اونچا کیوں نہ ہو تعلیم کا معیار کالج میں

مری مجبوریوں نے نازکی کا خون کر ڈالا
ہر اک گوبھی بدن کو گل بدن لکھنا پڑا مجھ کو

جب پڑھا جور و جفا میں نے تو آئی یہ صدا
ٹھیک سے پڑھ اسے جورو ہے جفا سے پہلے

ایک شادی تو ٹھیک ہے لیکن
ایک دو تین چار حد کر دی

مرد ہونی چاہیے خاتون ہونا چاہیے
اب گرامر کا یہی قانون ہونا چاہیے
رات کو بچے پڑھائی کی اذیت سے بچے
ان کو ٹی وی کا بہت ممنون ہونا چاہیے


دوستو انگلش ضروری ہے ہمارے واسطے
فیل ہونے کو بھی اک مضمون ہونا چاہیے
نرسری کا داخلہ بھی سرسری مت جانئے
آپ کے بچے کو افلاطون ہونا چاہیے


صرف محنت کیا ہے انورؔ کامیابی کے لئے
کوئی اوپر سے بھی ٹیلیفون ہونا چاہیے

شش جہت نہ فلک آئیں گے نظر دو بٹا تین
چھ بٹا نو کے برابر ہے اگر دو بٹا تین
دو کھلونے جو کبھی ہم نے تپائی پہ دھرے
آ گئے صاف مہندس کو نظر دو بٹا تین


طالب خیر نہ ہوں گے کبھی انسان سے ہم
نام اس کا ہے بشر اس میں ہے شر دو بٹا تین
منحصر قوت بازو پہ ہے دولت مندی
دیکھ لو زور میں موجود ہے زر دو بٹا تین


ملک الموت سے دنیا میں ہراساں نہیں کون
جس کو کہتے ہیں نڈر اس میں ہے ڈر دو بٹا تین
بیسویں رات مہینے کی جب آ جاتی ہے
غم میں رہ جاتا ہے گھل گھل کے قمر دو بٹا تین


ظالمو خوف کرو آہ کو سمجھو نہ حقیر
لفظ اللہ میں ہے اس کا اثر دو بٹا تین
کھوٹی منزل کئے دیتی ہے تری یاد ندیم
راہ رو کا ابھی باقی ہے سفر دو بٹا تین


دو بٹا تین کی رکھی ہے جو اے جوشؔ ردیف
شعر بھی نکلے ہیں مقبول نظر دو بٹا تین

مثال آئینہ یارو نکھر گیا کل شب
عجیب سانحہ دل پہ گزر گیا کل شب
بساط دشت پہ یوں چاندنی تھی رقص کناں
کہ جیسے چاند کا ہر زخم بھر گیا کل شب


سیاہ رات کا وہ راہب چراغ بکف
سنو وہ کرمک شب تاب بھر گیا کل شب
کچھ اتنا چہرہ بھیانک تھا خواب میں اس کا
کہ اپنے آپ سے پاشاؔ بھی ڈر گیا کل شب

محشر میں گئے شیخ تو اعمال ندارد
جس مال کے تاجر تھے وہی مال ندارد