نظم شاعری

دیے چاروں طرف ہر جا فروزاں دیکھتا ہوں میں
نظر پڑتی ہے جس پر بھی درخشاں دیکھتا ہوں میں
فضاؤں میں خوشی کا رقص عریاں دیکھتا ہوں میں
وطن کو اس گھڑی فرحت بداماں دیکھتا ہوں میں


علاج تنگیٔ دامان یاراں چاہتا ہوں میں
نفاق کفر و ایماں کو گریزاں چاہتا ہوں میں
منور سینہ ہو جائے فروغ شمع الفت سے
دل اہل وطن کو بھی فروزاں چاہتا ہوں میں


اندھیرا گھر میں ہو باہر اجالا ہو تو کیا حاصل
وطن والو دلوں میں بھی اجالا چاہتا ہوں میں

تری تصویر کہتی ہے
مجھے تم غور سے دیکھو
مری آنکھوں میں جھانکو تم
مری زلفوں سے الجھو تم


تقاضے روح کے اپنے
تقاضے جسم کے اپنے
کرو پورے اجازت ہے
مگر تم کو اجازت یہ


فقط خوابوں کی حد تک ہے

رکشے والے رکشے والے
دھوپ میں سب کے چہرے کالے
کیسی گرمی کیسی دھوپ
سب نے بدلا اپنا روپ


تھوڑی دیر ٹھہر کر چلنا
ٹھنڈا پانی منہ پر ملنا
سر پر اپنے کپڑا رکھنا
رکھشا لے کر آگے بڑھنا


گرمی سے بے حال ہوئے ہیں
سوکھے سارے تال ہوئے ہیں
پیٹ کا ایندھن یوں نہ بھرنا
ایسے ویسے کام نہ کرنا


نام خدا کا ہر دم لینا
اس کی قدرت روزی دینا
رکشے والے رکشے والے
دھوپ میں سب کے چہرے کالے

تمہیں دیکھتا ہوں
تو یہ سوچتا ہوں
کہ کیوں سبز آنکھیں
تمہاری مجھے دیکھتی ہیں


اگر ہو سکے تو انہیں یہ
بتا دو
کہ محرم نہیں ہوں
میں ان کے لیے

اسی اک سوچ میں گم تھا
نگاہیں تک رہی ہیں
کیوں
مجھے کیوں دیر سے سب کی


اسی میں
سوچ میں گم تھا
اچانک پھر
کسی نے کان میں


آ کر
کہا دھیرے سے
یہ مجھ سے
ارے منانؔ


عینک
کہیں گم ہو گئی
کیا

ننھا منا پیارا پیارا میرا چھوٹا بھائی ہے
یعنی سب کی آنکھ کا تارا میرا چھوٹا بھائی ہے
بندر بن کر بھالو بن کر
سب کو ناچ دکھاتا ہے


گلی گلی کا اک اک بچہ
اس کا ساتھ نبھاتا ہے
آنگن آنگن شور مچا کر
دل سب کا بہلاتا ہے


بالنگ کرنا سیکھ گیا ہے
بیٹنگ کرنا سیکھ گیا ہے
چوکے چھکے مار رہا ہے
جیت رہا ہے ہار رہا ہے


اس کی صبح ہے اس کی شام
گھر گھر جانا اس کا کام
گھر والوں کی جان ہے وہ
خود اپنی پہچان ہے وہ


ننھا منا پیارا پیارا میرا چھوٹا بھائی ہے
یعنی سب کی آنکھ کا تارا میرا چھوٹا بھائی ہے

کیوں سمجھتے ہو تم مجھے گڑیا
کیا میں گڑیا دکھائی دیتی ہوں
میرا اپنا وجود کوئی نہیں
میری گویائی میری بینائی


صرف دھوکہ نظر کا دھوکہ ہے
بھر گیا دل تو طاق میں رکھ کر
بھول جاتے ہو تم
کہ میں کیا ہوں

کبھی سوچا ہے تم نے
کہ میرے بے سبب
ہنسنے کی آخر وجہ کیا ہے
جانتے ہو تم


کہ دیوانہ نہیں ہوں میں
مگر پھر بھی کبھی غمگیں نہیں ہوتا
اداسی میرے چہرے سے
کبھی ظاہر نہیں ہوتی


میں خود حیران ہوں
کیا ہے
بلا ہے
یا خدا کا معجزہ ہے

اک لڑکی
جو اکثر مجھ سے ملتی ہے
جس کا کہ نورانی چہرہ
جس کی نیلی نیلی آنکھیں


تم سے ملتی جلتی ہیں
سوچ رہا ہوں
تم سے پوچھوں
کون ہے وہ


تم یا اور کوئی

مجھے حیرت ہے کیسے جی رہا ہوں
تمہیں دیکھا نہیں ہے
ایک مدت سے
مگر میں پوچھتا ہوں


اپنے دل سے
چھلک اٹھتی ہیں کیوں آنکھیں
تمہاری یاد آتے ہی

یا محبت یا وفا
زندگی تیری ضیا
روشنی یا سائباں
آسمانوں سی ردا


زندگی اک شور ہے
خامشی بھی اک صدا
بندگی بھی تشنگی
کس قدر دل کش ادا


یہ جہاں تسخیر کر لے
وہ جہاں ہے ماورا

اندھیرے ہٹاؤ اجالے بچھاؤ
صداقت سے اپنے وطن کو سجاؤ
تمہارے لیے نعمتیں ہیں جہاں کی
چلو ساتھ مل کے نصیب آزماؤ


خودی بھی تمہاری خدا بھی تمہارا
خدا کے لیے جان پر کھیل جاؤ
تمہیں رحمتوں کا سہارا ملے گا
محبت سے محنت کا جادو جگاؤ


پھر آواز افلاس کی آ رہی ہے
بڑھو اپنی دھرتی پہ سونا اگاؤ
خیالات کو ایک مرکز پہ لاؤ
اٹھو نوجوانو وطن کو بچاؤ


یہ امن و اماں کے طلب گار بندے
یہ مزدور بندے یہ جی دار بندے
یہ صابر یہ شاکر یہ ذاکر یہ زاہد
یہ دین الہٰی کے معمار بندے


ابھی رو رہے تھے ابھی ہنس رہے ہیں
یہ مجبور بندے یہ مختار بندے
نگاہوں میں اپنے سمائے ہوئے ہیں
فریب نظر میں گرفتار بندے


گلستاں میں ہیں جو گلوں کے محافظ
انہیں آج ان کی حقیقت بتاؤ
گئے وقت کا آئینہ بھی دکھاؤ
اٹھو نوجوانو وطن کو بچاؤ


محبت میں نفرت سے بچ کر چلیں گے
کدورت مٹے گی تو ساغر چلیں گے
زبردست ہیں زیر دستوں پہ حاوی
کہ تیغوں کے سائے میں خنجر چلیں گے


محبت کو بھی حرف آخر نہ سمجھو
محبت سے آگے بھی سوز سخن ہے
جہنم کے شعلے بھڑکنے سے پہلے
صدا آ رہی ہے کہ تن کو بچاؤ


خرابے سے صحن چمن کو بچاؤ
اٹھو نوجوانو وطن کو بچاؤ
ادھر انقلابی تقدس بڑھے گا
ادھر چاند تاروں کے چکر چلیں گے


اجالے میں ہر کھیل کھیلو خوشی سے
اندھیرے سے پہلے مگر چل چلیں گے
در مے کدہ بند ہونے نہ دینا
اگر توڑ سکتے نہیں ٹوٹ جاؤ


پھر اپنے خدا کو سہارا بناؤ
اٹھو نوجوانو وطن کو بچاؤ
یہی پاک دھرتی ہمارا وطن ہے
اسی کی ترقی ہماری لگن ہے


جیالے جوانوں کی دانشوروں کی
یہی انجمن ہے یہی انجمن ہے
شجاعت کے قصے کہاں تک سناؤں
جوانی کی خوشبو چمن در چمن ہے

ہر ایک دل ربا ملا
ہر ایک باوفا ملا
جسے تھا پاس دوستی
وہی اٹھا بڑھا ملا


نشست جس کی دور تھی
قریب آ گیا ملا
پشاور آنے کا مجھے
سہی جو لطف تھا ملا


ہنسی ملی خوشی ملی
خودی ملی خدا ملا
رقیب تھا کھچا کھچا
حبیب تھا گھلا ملا


نظر نظر ادا ادا
میں دیکھتا چلا گیا
گلوں میں زندگی ملی
چمن میں دل کشی ملی


خوشی گلے لگی ملی
ملی ہنسی خوشی ملی
چمن چمن روش روش
بہار حسن کی ملی


کہیں بناوٹیں ملیں
کہیں پہ سادگی ملی
کہیں پہ ظلمتیں ملیں
کہیں پہ روشنی ملی


نظر کسی نگاہ سے
کبھی ہٹی کبھی ملی
نہ تھا کوئی جو ٹوکتا
میں دیکھتا چلا گیا


ہر ایک سمت خان ہیں
شکیل ہیں جوان ہیں
نہ نون ہیں نہ نان ہیں
یہ سب کے سب پٹھان ہیں


جہاد ان کی شان ہے
جہاد کی یہ شان ہیں
یہ غازیوں کے ہیں پسر
مجاہدوں کی جان ہیں


یہ سب خدا پرست ہیں
خودی کے ترجمان ہیں
بڑی بڑی حویلیاں
بڑے بڑے نشان ہیں


نظارہ ہائے دل ربا
میں دیکھتا چلا گیا
عجیب چیز ہے یہاں
حسین رات کا سماں


نگاہ جس طرف کرو
چمک رہی ہیں بجلیاں
حسین لوگ چار سو
سڑک پہ ہیں رواں دواں


عمارتوں کے سامنے
جھکا ہوا ہے آسماں
کہ دیکھنے کی چیز ہیں
ادھر ادھر یہاں وہاں


سکٹریوں کی موٹریں
کمشنروں کی کوٹھیاں
بہار تھی نکھار تھا
میں دیکھتا چلا گیا


یہ خوش لباس لڑکیاں
حسیں حسیں جواں جواں
حصول علم کے لیے
قدم قدم رواں دواں


خوشی سے دل مہک اٹھے
نظر پڑی جہاں جہاں
کھلی ہوئی کتاب میں
شرافتوں کی داستاں


حقیقتیں سمٹ گئیں
ٹھہر کے دم لیا جہاں
شراب کی مثال ہیں
شباب کی یہ سرخیاں


یہ انقلاب کی ادا
میں دیکھتا چلا گیا
حکیم بھی ہیں پیر بھی
امیر بھی کبیر بھی


اسمبلی میں جلوہ گر
بڑے بڑے وزیر بھی
کہ جن کے ووٹروں میں ہیں
اقیل بھی کثیر بھی


انہیں کے دم سے آج ہے
یہ شہر بے نظیر بھی
ہمارے لیڈروں میں ہیں
شہیر بھی بصیر بھی


مقیم اس مقام پر
ہیں ایک دو سفیر بھی
یوںہی بس اتفاق تھا
میں دیکھتا چلا گیا


غریب لوگ با وفا
امین غیرت و حیا
دھنی ہیں اپنی بات کے
نہیں ہے خوف جان کا


مسرتوں کی بات کر
مصیبتوں کا ذکر کیا
کبھی جو وقت آ پڑا
برا بھلا گزر گیا


دہی قدیم بات ہے
نہ کچھ گھٹا نہ کچھ بڑھا
کہ شکر جن کی شان ہے
شکایتوں سے ان کو کیا


پھٹا ہوا لباس تھا
میں دیکھتا چلا گیا
یہ شاعروں کی بزم ہے
کہ عرصہ گاہ رزم ہے


طرح طرح کی بولیاں
الگ الگ ہیں ٹولیاں
سخن میں کوئی فرد ہے
کسی کا رنگ زرد ہے


ہیں ان میں شہسوار بھی
بزرگ با وقار بھی
سبھی میں یہ کمال ہے
ہر اک جگہ یہ حال ہے


مریض ہو کہ ہو مرض
مجھے کسی سے کیا غرض
مشاعرہ ضرور تھا
میں دیکھتا چلا گیا

محبت خالق ہر دو جہاں ہے
محبت دین فطرت کی زباں ہے
محبت جذبۂ صدق و یقیں ہے
محبت ہی محبت کی امیں ہے


محبت طالب حسن و جوانی
محبت پھول کانٹوں کی کہانی
محبت شاہد وحدانیت ہے
محبت جذبۂ انسانیت ہے


محبت حرف شیریں کی امانت
محبت جذبۂ دل کی صداقت
محبت جسم بھی ہے جان بھی ہے
محبت فطرت انسان بھی ہے


کہا جس کو فرشتوں نے عبادت
محبت ہے محبت ہے محبت
محبت دشمن رہبانیت ہے
محبت کلمۂ انسانیت ہے


محبت رہنمائے آدمی ہے
محبت سوز و ساز زندگی ہے
محبت عشق کا طوفان بھی ہے
محبت حسن کا ایمان بھی ہے


محبت فلسفہ ہے دوستی کا
محبت میں سبق ہے زندگی کا
محبت فاتح و مفتوح بھی ہے
محبت حامد و ممدوح بھی ہے


محبت ہے یقین کامرانی
محبت دار کی بھی ہے کہانی
محبت دین و دنیا کی طلب ہے
محبت فکر ہے علم و ادب ہے


محبت طرز بھی انداز بھی ہے
محبت ساز بھی آواز بھی ہے
محبت جاں نثاروں کی خوشی ہے
محبت حسن کی زندہ دلی ہے


محبت کا نہیں ہے ایک پہلو
محبت پر نہ پایا دل نے قابو
محبت نغمۂ روز ازل ہے
محبت قاضیٔ شہر عمل ہے


محبت درد ہے دیوانگی ہے
محبت فرض ہے مردانگی ہے
محبت امتحان زندگی ہے
محبت دیوتا کی مورتی ہے


محبت رحمتوں کی داستاں ہے
محبت مرد مومن کی اذاں ہے
محبت رونق دنیا و دیں ہے
محبت چاند سورج کی زمیں ہے


محبت گل بھی ہے اور گلستاں بھی
محبت خارزاروں کی زباں بھی
محبت دعوت رنج و الم بھی
محبت ہے نوید فکر و غم بھی


محبت ولولوں کی انتہا بھی
بڑھاپے میں جوانی کی صدا بھی
محبت ہی خوشی کا راستہ ہے
محبت ہی میں دنیا کا بھلا ہے


محبت قصۂ جام و سبو ہے
محبت زندگی کی جستجو ہے
محبت آدم و حوا نے کی ہے
محبت روح کی پاکیزگی ہے


محبت چین ہے صبر و سکوں ہے
محبت راحت اہل جنوں ہے
محبت سے ہے رونق محفلوں کی
محبت کب خطا ہے تھڑ دلوں کی


محبت ہر سلیقے کا نشاں ہے
محبت ہر نفس کی داستاں ہے
محبت معنیٔ حسن سخن ہے
محبت اللہ والوں کا چلن ہے


محبت صاحب علم الیقیں بھی
محبت روح بھی روح الامیں بھی
محبت عشق ہے ضرب خودی ہے
محبت ذوالفقار حیدری ہے


محبت بھید کھولے آرزو کے
محبت زندگی کے غم سمیٹے
محبت نفسیاتی الجھنوں سے
ورق الٹے صداقت کے جنوں کے


محبت ہے علاج ضبط انساں
محبت امتحان ضبط انساں
محبت کی الگ سب سے ہے بولی
محبت کی گرہ فطرت نے کھولی


محبت صاحب فکر و نظر ہے
محبت میں رقابت کا بھی ڈر ہے
محبت دو جہاں میں سرخ رو بھی
محبت گل محبت رنگ و بو بھی


محبت ماہتابوں سے بنی ہے
محبت انقلابوں سے بنی ہے
محبت کا نشہ ہے سب سے بہتر
محبت پارۂ تسنیم و کوثر


محبت شعلہ ہے شعلہ نما ہے
محبت ہی حقیقت میں خدا ہے

بھکر کے بازار کو دیکھا
صحرا میں گلزار کو دیکھا
مجبوروں کے پیٹ کو دیکھا
قائد اعظم گیٹ کو دیکھا


کیا سمجھے کیا جانے دیکھا
سب کو سینہ تانے دیکھا
شلواروں سے عاری دیکھا
تہ بندوں کو جاری دیکھا


کلیوں کو شرماتے دیکھا
کھل کر ڈھولا گاتے دیکھا
ہوٹل والے عرش پہ دیکھے
ہوٹل سارے فرش پہ دیکھے


گاہک اور بیوپاری دیکھے
دبلے دیکھے بھاری دیکھے
صاف اور پھیلے پھیلے دیکھے
کپڑے میلے میلے دیکھے


لڑکے چھیل چھبیلے دیکھے
ہر سو ریت کے ٹیلے دیکھے
ٹوٹے پھوٹے نالے دیکھے
مخلص تانگے والے دیکھے


بستی رستی بستی دیکھی
ملکوں کی بھی ہستی دیکھی
گلی گلی دل افزا دیکھی
تھل والوں کی دنیا دیکھی


مزدوروں کی محفل دیکھی
دور سے کپڑے کی مل دیکھی
بیگم دیکھی باندی دیکھی
دھن والوں کی چاندی دیکھی


دولت عزت والی دیکھی
جیب غریب کی خالی دیکھی
رحم کے طالب بندے دیکھے
زرداروں کے پھندے دیکھے


علم و ادب کے پالے دیکھے
شہرت کے متوالے دیکھے
شاعر شعر سناتے دیکھے
سامع سردی کھاتے دیکھے


دل بڑھتے دل گھٹتے دیکھے
مرغ بٹیرے بٹتے دیکھے
حال میں دونگڑا پڑتے دیکھے
بھوکے شیر کو لڑتے دیکھے


اک تصویر نرالی دیکھی
دانے بھوننے والی دیکھی
شعلہ دیکھا شبنم دیکھی
پھولوں میں خوشبو کم دیکھی


دنیا آنکھیں ملتے دیکھی
وقت کی چکی چلتے دیکھی
ناسوروں کو رستے دیکھا
انسانوں کو پستے دیکھا


کچھ شطرنج کی بازی دیکھی
کچھ مہمان نوازی دیکھی
ایک طرف انسان کو دیکھا
شیخ کو دیکھا خان کو دیکھا


پیاروں کے انداز کو دیکھا
صوفی جی کے ناز کو دیکھا
ایک ادائے خاص کو دیکھا
لوگوں کے اخلاص کو دیکھا


شیر افضل کی شان کو دیکھا
مومن کے ایمان کو دیکھا
عدمؔ نے چھپ کر ساقی دیکھا
ہم نے سب کچھ باقی دیکھا

ہمچو سبزہ بارہا روئیدہ ایم
(رومیؔ)
پھر اک دن ایسا آئے گا
آنکھوں کے دئیے بجھ جائیں گے


ہاتھوں کے کنول کمھلائیں گے
اور برگ زباں سے نطق و صدا
کی ہر تتلی اڑ جائے گی
اک کالے سمندر کی تہ میں


کلیوں کی طرح سے کھلتی ہوئی
پھولوں کی طرح سے ہنستی ہوئی
ساری شکلیں کھو جائیں گی
خوں کی گردش دل کی دھڑکن


سب راگنیاں سو جائیں گی
اور نیلی فضا کی مخمل پر
ہنستی ہوئی ہیرے کی یہ کنی
یہ میری جنت میری زمیں


اس کی صبحیں اس کی شامیں
بے جانے ہوئے بے سمجھے ہوئے
اک مشت غبار انساں پر
شبنم کی طرح رو جائیں گی


ہر چیز بھلا دی جائے گی
یادوں کے حسیں بت خانے سے
ہر چیز اٹھا دی جائے گی
پھر کوئی نہیں یہ پوچھے گا


سردارؔ کہاں ہے محفل میں
لیکن میں یہاں پھر آؤں گا
بچوں کے دہن سے بولوں گا
چڑیوں کی زباں سے گاؤں گا


جب بیج ہنسیں گے دھرتی میں
اور کونپلیں اپنی انگلی سے
مٹی کی تہوں کو چھیڑیں گی
میں پتی پتی کلی کلی


اپنی آنکھیں پھر کھولوں گا
سر سبز ہتھیلی پر لے کر
شبنم کے قطرے تولوں گا
میں رنگ حنا آہنگ غزل


انداز سخن بن جاؤں گا
رخسار عروس نو کی طرح
ہر آنچل سے چھن جاؤں گا
جاڑوں کی ہوائیں دامن میں


جب فصل خزاں کو لائیں گی
رہ رو کے جواں قدموں کے تلے
سوکھے ہوئے پتوں سے میرے
ہنسنے کی صدائیں آئیں گی


دھرتی کی سنہری سب ندیاں
آکاش کی نیلی سب جھیلیں
ہستی سے مری بھر جائیں گی
اور سارا زمانہ دیکھے گا


ہر قصہ مرا افسانہ ہے
ہر عاشق ہے سردارؔ یہاں
ہر معشوقہ سلطانہؔ ہے
میں ایک گریزاں لمحہ ہوں


ایام کے افسوں خانے میں
میں ایک تڑپتا قطرہ ہوں
مصروف سفر جو رہتا ہے
ماضی کی صراحی کے دل سے


مستقبل کے پیمانے میں
میں سوتا ہوں اور جاگتا ہوں
اور جاگ کے پھر سو جاتا ہوں
صدیوں کا پرانا کھیل ہوں میں


میں مر کے امر ہو جاتا ہوں

کل بازار میں بھیا شافی
پینے آئے ٹھنڈی کافی
اک دو پیکٹ بسکٹ کھائے
ٹھونس گئے دو درجن ٹافی


آلو چھولے کھا کر بولے
برفی ایک کلو ہے کافی
امی جی کی بات نہ مانی
ابو سے کی وعدہ خلافی


پیٹ ہوا آپے سے باہر
سہما کر سب نا انصافی
ایسا کھٹکا پیٹ کا مٹکا
اللہ معافی اللہ معافی

گڈو کا بھی حال سنائیں
دودھ پئیں نہ انڈے کھائیں
پھل ترکاری ایک نہ بھائے
غصے میں بس ہونٹ چبائیں


دیکھ کے دستر خوان پہ مچھلی
پاؤں پٹختے بھاگے جائیں
چاول روٹی گوشت کی بوٹی
دیکھیں تو نخرے دکھلائیں


دن کا ہو یا رات کا کھانا
روئیں پیٹیں شور مچائیں
دبلے پتلے روکھے سوکھے
بات کرو تو لڑنے آئیں


اتنے ہلکے پھلکے سے ہیں
فین چلے تو اڑ ہی جائیں

جوں ہی سورج چڑھتا ہے
چوزہ اٹھ کر پڑھتا ہے
چوں چوں چوں چوں
چوں چوں چوں چوں


پہلے بسم اللہ کہوں
پھر میں اپنا سبق پڑھوں
صبح سویرے اٹھتے ہی
اپنے رب کو یاد کروں


کھانے پینے سے پہلے
چونچ رگڑ کر صاف کروں
اتنا تو ہے یاد مجھے
امی آگے کیا سیکھوں


مرغی کٹ کٹ کرتی ہے
خوش ہو کر یوں کہتی ہے
میرا چو چو شاد رہے
شاد رہے آباد رہے


پڑھنے ہی سے عزت ہے
بات یہ بیٹا یاد رہے
جاہل لوگ زمانے میں
خوار ہوئے برباد رہے


سیکھیں اور سکھائیں جو
بن کر وہ استاد رہے
بس تو بھی محنت سے پڑھ
سب لوگوں سے آگے بڑھ

غم مسلسل کی اس تپش میں کہ جسم جل جائے آدمی کا
ہنسی کی ہلکی پھوار بھی ہو تو کام چل جائے آدمی کا
مزاح کی گر ذرا بھی حس ہے ہنسی کو اور قہقہے کو چھوڑو
چمن میں گر پھول مسکرا دے تو دل بہل جائے آدمی کا


مصیبتوں کا مقابلہ جو ہمیشہ ہنستے ہوئے کرے گا
جو وقت مشکل میں آنے والا تو وہ بھی ٹل جائے آدمی کا
کسی کو گرنے سے ٹوکنا مت درشت لہجے میں یاد رکھو
تبسم آمیز ہو نصیحت قدم سنبھل جائے آدمی کا


زمانہ اچھا گزر گیا تو یہ دن برے بھی نہیں رہیں گے
نہ ہو اگر یہ فریب پیہم تو دم نکل جائے آدمی کا
گناہ گاروں اور عاصیوں کو عذاب دوزخ سے واعظو تم
ڈراؤ بے شک مگر نہ اتنا کہ دل دہل جائے آدمی کا


عبادتوں کے معاوضے میں ملے گی جو عابدوں کو جنت
تم اس کا نقشہ کچھ ایسا کھینچو کہ دل پھسل جائے آدمی کا
نزع سے پہلے کرے جو توبہ وہ اپنی رحمت سے بخش دے گا
عجب نہیں ہے کہ مرتے مرتے بھی دل بدل جائے آدمی کا


یہ دور میک اپ کا آ گیا ہے وہ حسن سادہ کہاں ملے اب
کہ جس کی بس اک جھلک کو دیکھے تو دل مچل جائے آدمی کا
فضائے مسموم میں سانس لے کر کوئی جیا بھی تو کیا کرے گا
ضعیف ہونے سے قبل ہی جب شباب ڈھل جائے آدمی کا


نہ اتنی آسان شاعری ہو کہ جس کا مفہوم ہی نہ نکلے
نہ اتنی مشکل کہ جس کو سن کر ذہن پگھل جائے آدمی کا
یہ زندگی ؔخواہ مخواہ اتنی عذاب جاں اور طویل بھی ہے
اگر نہ ہوں محفلیں ہنسی کی تو دم نکل جائے آدمی کا

جبین وقت پر کیسی شکن ہے ہم نہیں سمجھے
کوئی کیوں کر حریف علم و فن ہے ہم نہیں سمجھے
کسی بھی شمع سے بے زار کیوں ہو کوئی پروانہ
یہ کیا اس دور کا دیوانہ پن ہے ہم نہیں سمجھے


بہت سمجھے تھے ہم اس دور کی فرقہ پرستی کو
زباں بھی آج شیخ و برہمن ہے ہم نہیں سمجھے
اگر اردو پہ بھی الزام ہے باہر سے آنے کا
تو پھر ہندوستاں کس کا وطن ہے ہم نہیں سمجھے


چمن کا حسن تو ہر رنگ کے پھولوں سے ہے راشدؔ
کوئی بھی پھول کیوں ننگ چمن ہے ہم نہیں سمجھے

کاش حاصل ہو حقیقی زندگی کا ایک دن
سر خوشی کا ایک لمحہ یا خوشی کا ایک دن
کر دیا ہے شورش عالم نے دیوانہ مجھے
ہے بساط دہر وحشت ناک ویرانہ مجھے


اک نئی دنیا کی خلقت ہے مری تخئیل میں
جو معاون ہو سکے انسان کی تکمیل میں
اہتمام زندگی جس میں بطور خاص ہو
آسماں جس کا محبت ہو زمیں اخلاص ہو


کرشن کی آج یاد رفتہ محفل زندہ کرو
برج و گوکل کی بجھی شمعوں کو تابندہ کرو
خشکیٔ گنگ و جمن کی آبیاری کے لئے
دعوتیں دو گوپیوں کو رنگ باری کے لئے


از سر نو پھر مرتب ہو جہان رنگ و بو
خار و خس سے پھر ہو پیدا کارخانے رنگ و بو
پریم رس سے لاؤ بھر کر خوش نما پچکاریاں
ہوں نئی دامان ہستی پر لطافت باریاں


روح کی آواز ہم آئیں گے ساز و چنگ ہو
جو پڑے انساں پہ وہ انسانیت کا رنگ ہو
چاہتا ہوں یوں ہو رنگیں پیرہن اور ساریاں
شست و شو سے بھی نہ زائل ہو سکیں گل کاریاں


جسم کی صورت رہے دل بھی مسرت میں شریک
روح آزادی بھی ہو جائے حقیقت میں شریک
چاہتا ہوں گلشن کہنہ پر آ جائے شباب
تنکا تنکا پھول ہو اور پتا پتا آفتاب


تازگی وجہ شگفت خاطر عالم رہے
میری دنیا میں ہمیشہ ایک ہی موسم رہے
شاعر و صناع ہو فکر و خلش سے بے نیاز
خواجہ و مزدور میں باقی نہ ہو کچھ امتیاز


ارتقا کے رنگ سے لبریز جھولی ہو میری
انقلاب ایسا کوئی ہو لے تو ہولی ہو میری

میاں تو ہم سے نہ رکھ کچھ غبار ہولی میں
کہ روٹھے ملتے ہیں آپس میں یار ہولی میں
مچی ہے رنگ کی کیسی بہار ہولی میں
ہوا ہے زور چمن آشکار ہولی میں


عجب یہ ہند کی دیکھی بہار ہولی میں
اب اس مہینے میں پہنچی ہے یاں تلک یہ چال
فلک کا جامہ پہن سرخیٔ شفق سے لال
بنا کے چاند کے سورج کے آسماں پر تھال


فرشتے کھیلیں ہیں ہولی بنا عبیر و گلال
تو آدمی کا بھلا کیا شمار ہولی میں
سنا کے ہولی جو زہرہ بجاتی ہے طبنور
تو اس کے راگ سے بارہ بروج ہیں معمور


چھوؤں ستاروں کے اوپر پڑا ہے رنگ کا نور
سبھوں کے سر پہ یہ ہر دم پکارتی ہے حور
جو گھر کے ابر کبھی اس مزے میں آتا ہے
تو بادلوں میں وہ کیا کیا ہی رنگ لاتا ہے


خوشی سے رعد بھی ڈھولک کی گت لگاتا ہے
ہوا کو ہولیاں گا گا کے کیا نچاتا ہے
تمام رنگ سے پر ہے بہار ہولی میں
چمن میں دیکھو تو دن رات ہولی رہتی ہے


شراب ناب کی گلشن میں نہر بہتی ہے
نسیم پیار سے غنچے کا ہاتھ گہتی ہے
تو باغبان سے بلبل کھڑی یہ کہتی ہے
نہ چھیڑ مجھ کو تو اے بد شعار ہولی میں


گلوں نے پہنے ہیں کیا کیا ہی جوڑے رنگ برنگ
کہ جیسے لڑکے یہ معشوق پہنتے ہیں تنگ
ہوا سے پتوں کے بجتے ہیں تال اور مردنگ
تمام باغ میں کھیلیں ہیں ہولی گل کے سنگ


عجب طرح کی مچی ہے بہار ہولی میں
امیر جتنے ہیں سب اپنے گھر میں ہیں خوش حال
قبائیں پہنے ہوئے تنگ تنگ گل کی مثال
بنا کے گہری طرح حوض مل کے سب فی الحال


مچائے ہولیاں آپس میں لے عبیر و گلال
بنے ہیں رنگ سے رنگیں نگار ہولی میں
یہ سیر ہولی کی ہم نے تو برج میں دیکھی
کہیں نہ ہووے گی اس لطف کی میاں ہولی


کوئی تو ڈوبا ہے دامن سے لے کے تا چولی
کوئی تو مرلی بجاتا ہے کہہ کنہیا جی
ہے دھوم دھام پہ بے اختیار ہولی میں
گھروں سے سانوری اور گوریاں نکل چلیاں


کسنبی اوڑھنی اور مست کرتی اچھلیاں
جدھر کو دیکھیں ادھر مچ رہی ہیں رنگ رلیاں
تمام برج کی پریوں سے بھر رہیں گلیاں
مزا ہے سیر ہے در ہر کنار ہولی میں


جو کچھ کہانی ہے ابلا بہت پیا ماری
چلی ہے اپنے پیا پاس لے کے پچکاری
گلال دیکھ کے پھر چھاتی کھول دی ساری
پیا کی چھاتی سے لگتی وہ چاؤ کی ماری


نہ تاب دل کو رہی نے قرار ہولی میں
جو کوئی سیانی ہے ان میں تو کوئی ہے نا کند
وہ شور بور تھی سب رنگ سے نپٹ یک چند
کوئی دلاتی ہے ساتھن کو یار کی سوگند


کہ اب تو جامہ و انگیا کے ٹولے ہیں سب بند
پھر آ کے کھلیں گے ہو کر دو چار ہولی میں
نظیرؔ ہولی کا موسم جو جگ میں آتا ہے
وہ ایسا کون ہے ہولی نہیں مناتا ہے


کوئی تو رنگ چھڑکتا ہے کوئی گاتا ہے
جو خالی رہتا ہے وہ دیکھنے کو جاتا ہے
جو عیش چاہو سو ملتا ہے یار ہولی میں

وہ صبح کبھی تو آئے گی
ان کالی صدیوں کے سر سے جب رات کا آنچل ڈھلکے گا
جب دکھ کے بادل پگھلیں گے جب سکھ ساگر چھلکے گا
جب امبر جھوم کے ناچے گا جب دھرتی نغمے گائے گی


وہ صبح کبھی تو آئے گی
جس صبح کی خاطر جگ جگ سے ہم سب مرمر کے جیتے ہیں
جس صبح کے امرت کی دھن میں ہم زہر کے پیالے پیتے ہیں
ان بھوکی پیاسی روحوں پر اک دن تو کرم فرمائے گی


وہ صبح کبھی تو آئے گی
مانا کہ ابھی تیرے میرے ارمانوں کی قیمت کچھ بھی نہیں
مٹی کا بھی ہے کچھ مول مگر انسانوں کی قیمت کچھ بھی نہیں
انسانوں کی عزت جب جھوٹے سکوں میں نہ تولی جائے گی


وہ صبح کبھی تو آئے گی
دولت کے لئے جب عورت کی عصمت کو نہ بیچا جائے گا
چاہت کو نہ کچلا جائے گا غیرت کو نہ بیچا جائے گا
اپنے کالے کرتوتوں پر جب یہ دنیا شرمائے گی


وہ صبح کبھی تو آئے گی
بیتیں گے کبھی تو دن آخر یہ بھوک کے اور بیکاری کے
ٹوٹیں گے کبھی تو بت آخر دولت کی اجارہ داری کے
جب ایک انوکھی دنیا کی بنیاد اٹھائے جائے گی


وہ صبح کبھی تو آئے گی
مجبور بڑھاپا جب سونی راہوں کی دھول نہ پھانکے گا
معصوم لڑکپن جب گندی گلیوں میں بھیک نہ مانگے گا
حق مانگنے والوں کو جس دن سولی نہ دکھائی جائے گی


وہ صبح کبھی تو آئے گی
فاقوں کی چتاؤں پر جس دن انساں نہ جلائے جائیں گے
سینے کے دہکتے دوزخ میں ارماں نہ جلائے جائیں گے
یہ نرک سے بھی گندی دنیا جب سورگ بتائی جائے گی


وہ صبح کبھی تو آئے گی

قمیض الٹی پہن لیتا ہوں وحشت میں
کبھی جوتا نہیں ملتا
کئی رنگوں کے موزے ہیں مگر اچھے نہیں لگتے
ادھڑتی جا رہی ہے شرٹ جیون کی طرح


گردن سے لے کر آستینوں تک
بچھڑنے سے ذرا پہلے
جو طارق روڈ سے ہم نے خریدی تھی
تمھارے بعد کیفیت بدلتی جا رہی ہے رکھ رکھاؤ کی


پتا چلتا نہیں کچھ دن گزرنے کا نہ موسم کے بدلنے کا
تمھارے ہاتھ سے لکھے ہوئے خط پڑھتا رہتا ہوں
لفافے پر خود اپنا نام لکھ کر پوسٹ کر دیتا ہوں دوبارہ
اور اس کے بعد دن بھر ڈاکئے کی راہ تکتا ہوں