پہیلی شاعری

چٹ بیٹھا پٹ مارا

اس تک یا اس پاس جو آئے
اس پر جادو سا چل جائے
بے بس گم سم کان دبائے
سر ٹیکے بے سدھ ہو جائے

سر تو اس کا پچھ پچا پنجے اس کے یوں
امیر خسرو یوں کہیں کہ بیچ میں لکڑی کیوں

بھون بھان کر ہر کوئی کھائے
دو میٹھوں کا نام دہرائے

پانی شربت جوس وغیرہ ہم سب پیتے رہتے ہیں
لیکن کیا ہے جس کو صرف بہادر ہی پی سکتے ہیں

بوجھ پہیلی سکھی سیانی
آدھا پھول اور آدھا پانی

ایک میں دیکھا اندھا نر
کندھے اوپر کاٹھ کا گھر
بارہ کوس کی منزل کرے
پھر وہ گھر کا گھر میں رہے

دنیا میری دیوانی ہے
صورت جانی پہچانی ہے
بن پیروں کے چلتا ہوں میں
کاغذ کا اک ٹکڑا ہوں میں


رنگ برنگی صورت میری
سب کے دل میں چاہت میری
دنیا بھر میں پایا جاؤں
ہر مشکل میں ساتھ نبھاؤں


مزدوروں کا ہوں میں پیارا
ساہوکار کی آنکھ کا تارا
بچہ بچہ مجھ پہ فدا ہے
بوڑھوں کا دل مجھ سے لگا ہے


دنیا کا ہر کام ہے مجھ سے
شہرت مجھ سے نام ہے مجھ سے
میری طاقت جو آ جائے
نربل کو بلوان بنائے


سمجھ میں آیا نام مرا کیا
پہچانا کچھ کام مرا کیا

ایک ڈبے میں بتیس دانے
بوجھنے والے بڑے سیانے

آگ لگے میرے ہی بل سے
ہر انساں کے آتی کام
دن میں پودے مجھے بناتے
اب بتلاؤ میرا نام

وہ کیا جس کا برا ہے آنا جانا جس کا اور برا
اٹھنا بیٹھنا بھی ہے جس کا باعث غم اور صدمے کا

ادھر ادھر موتیوں کی لڑی بیچ میں کوئل کھڑی

اک چیز ایسی کہلائے
ہر مذہب کا آدمی کھائے

دلی دیکھی آگرہ دیکھا اور دیکھا گجرات
ایسا اچنبھا کہیں نہ دیکھا پھل اوپر دو پات

اگر کہیں مجھ کو پا جاتا
بڑے پریم سے طوطا کھاتا
بچے بوڑھے اگر کھا جاتے
ویاکل ہو کر جل منگواتے

جب سے میں پیدا ہوا ہوں قتل کی تدبیر ہے
بھاگ کر جاؤں کہاں میں پیر میں زنجیر ہے
کھال کو چیریں گے کپڑوں کو پھاڑیں گے
دشمن جاں لہو کو پی لیں گے

سوچیں آپ لگا کر ٹیک
چوپایوں میں یہ بھی ایک

باندھ بوندھ میں نے جکڑا
ایک گدھا اور ایک بکرا
نر ناری سب کھائیں سدا
آدھا بکرا آدھا گدھا

در پہ لگے تو دکھائی پڑے
منہ پہ لگے تو سجھائی نہ دے
دم سادھے کیوں بیٹھو یارو
ہمت ہو تو کھول اتارو

ایک نام کے دو کہلائیں
ایک کو چھوڑیں ایک کو کھائیں

سیکھنے والا بولتا جائے
سکھانے والا چپ
اس سے میرا دھیان لڑا ہے
شور نہ کرنا چپ

اک ناری کا میلا رنگ
لگی رہے وہ پی کے سنگ
اجیارے میں سنگ براجے
اندھیارے میں چھور کے بھاجے

لنڈا منڈا بھانت
سر پر ناف پیٹ میں دانت
بھیگا بکرا اس کا ناؤں
یا بوجھو یا چھوڑو گاؤں

بیل پڑی تالاب میں پھول کھلتا جائے
عجب تماشا میں نے دیکھا پھول بیل کو کھائے

نعمتیں وہ کون سی ہیں جو ہم کو تم کو رب نے دیں
لیکن ان سے بابا آدم ماں حوا محروم رہیں