agar chahun jhatak kar tod dun zanjir-e-tanhai
main tinka hun magar maujon se hai meri shanasai

sharik-e-rah thi jab tak hamari aabla-pai
na mathe par shikan ubhri na panw mein thakan aai

hawa se subh-e-na-asudgi achchha kiya tu ne
kitab-e-zindagi ke kuchh waraq tu bhi uda lai

hazaron marhale the fasl-e-gul se chaak-e-daman tak
khizan guzri to kab guzri bahaar aai to kab aai

'nasim' ek din wo aaega ki mazlumon ke qadmon mein
panahen dhundhti hogi sitam-ranon ki darai