hayat di to use gham ka silsila bhi kiya
qaza ke sath qadar ko meri saza bhi kiya

usi ne dar-ba-dari ko nai talash bhi di
bura to us ne kya hi magar bhala bhi kiya

baghair mange hi dena hai shan-e-maulai
mera waqar bhi rakkha mujhe ata bhi kiya

tazad us ki mohabbat ka main hi jaanta hun
jalaya dhup mein aanchal ka aasra bhi kiya

ajib tarah ki hai shan-e-dilbari 'azar'
ki mujh se khush bhi raha aur mujhe khafa bhi kiya