parchhaiyon ki baat na kar rang-e-haal dekh
aankhon se ab hawa-o-hawas ka maal dekh

do sher jis ke qahr ki jangal mein dhum thi
meri nashist-gah mein ab us ki khaal dekh

khushbu ki tarah gunj utha harf-e-agahi
ai dil zara hisar-e-nafas ka zawal dekh

tujh se qarib aae to apni khabar na thi
duri ka ye azab ba-rang-e-visal dekh

bujhti hui sada ki tarah khud mein dub ja
pesh-e-nigah jab bhi tamanna ka jal dekh

palkon mein tez dhup ka manzar samet le
phir kasa-e-badan mein lahu ka ubaal dekh