baDi hi andheri Dagar hai miyan

badi hi andheri dagar hai miyan
jahan hum faqiron ka ghar hai miyan
hai fursat to kuchh der mil baithiye
judai se kis ko mafar hai miyan
gharaunde yahan ret ke mat banao
ki sail-e-hawa zor par hai miyan
kabhi but-shikan the par ab khud-shikan
ye ilzam bhi apne sar hai miyan
to phir kaj-kulahi pe israr kyun
agar sang-bari ka dar hai miyan
koi bach nikalne ki surat nahin
ye aaseb har mod par hai miyan
to phir rukh badalne se kya faeda
muqaddar jab andha safar hai miyan
Please share if you liked this!!!