holi

By

ajib rang se aai bahaar holi mein
zamin-e-hind bani lala-zar holi mein
bas ab to sar hai kadhai mein pancho ghi mein hain
bade maze ke hain lail-o-nahaar holi mein
har ek hai be-khud-o-sarshaar mast-o-diwana
baghair-e-dukhtar-e-raz hai khumar holi mein
piye hue hain sabhi aaj to mai-e-holi
bahak raha hai har ek baada-khwar holi mein
kisi ko galiyan din aur kisi ko thonk diya
ye chhod rakkhe hain kaise bijar holi mein
bashar ka zikr hi kya mast dasht-o-sahra hain
khushi se jhumte hain kohsar holi mein
uchhalte kudte hain nachte hain pi pi kar
khud apne chaak bane hain kumhaar holi mein
kahan ke saghar-o-mina kahan ke jam-o-subu
tum ok se piyo le ke udhaar holi mein
nasim-e-mast ke sadqe sharab ke qurban
lagate hain wo gale bar bar holi mein
samajh lo apna hi ghar is gharib-khane ko
bala se gar nahin milte kahaar holi mein
kaha jo marte hain tum par to hans ke farmaya
maren tumhaare adu dur par holi mein
'zarif' dekho to kaisi machai hai udham
phudak rahe hain ye kaise chamar holi mein

ek anokha hat

By

chuhe ne billi ko daudaya
bhag ke mere hat mein aai
chyunti ne danta hathi ko
bola hum bhi hain bhai
kutta bola chun chun chun
chidiya boli bhaun bhaun bhaun bhaun
sat samundar hat ke andar
dolphin ne ghazal sunai
aao bhai hat mein aao
sab parani hain bhai bhai

kya hai

By

gehun kya shai hai bajra kya hai
aur chawal hai kya chana kya hai
uf ye basta mere khuda kya hai
meri taqdir mein likha kya hai
ye school aur madrasa kya hai
in ke khulne ka muddaa kya hai
aaj tak ye samajh mein aa na saka
likhne padhne se faeda kya hai
ye kitaben ye copiyan ye qalam
in mein kuchh to kaho dhara kya hai
bas kitabon bhara bada basta
aur man bap ne diya kya hai
master mujh ko marte kyon hain
main ne un ko bhala kaha kya hai
aadmi se bana diya murgha
aur is se badi saza kya hai
der chhutti mein kya hai dekhun to
ab ghadi mein meri baja kya hai
hum ko ammi ye pahle batla do
chae ke sath nashta kya hai
jis ne khae na hon wo kya jaane
ras bhari kya hai ghalghala kya hai
sau gadhon par shakil hai bhaari
samne us ke ek gadha kya hai
sar munda kar wo aa raha hai tufail
badh ke de tip dekhta kya hai
baat 'yakta' ki man apne liye
soch achchha hai kya bura kya hai

wada

rakh to li baat teri ab na kabhi bolunga
ab tasawwur mein kabhi tujh ko na main gholunga
ab na phir panw kabhi teri taraf jaenge
ab na hathon ke irade tujhe chhu paenge
rakh to li baat teri ab na kabhi bolunga
ab na honton pe bila-wajh hansi chhaegi
ab na chehre pe koi shakl utar paegi
ab na zulfon ko tere hathon ki chahat hogi
ab na khwabon ko tere aane ki hasrat hogi
rakh to li baat teri ab na kabhi bolunga
ab na paimane mein taswir teri utregi
ab na dil se koi nazuk si khushi guzregi
ab na darwaze ki dastak pe nazar jaegi
ab na naghmon se mere teri mahak jaegi
rakh to li baat teri ab na kabhi bolunga

tu

kya kahun tujh ko main kya kah ke pukaron tujh ko
jaise qasid koi ek pyar mein dube khat ko
band darwaze ke pallon mein phansa deta hai
aur khat dekh ke ek ishq mein paband nazar
dil-e-mashuq ki har baat samajh jati hai
tu khinchi aati hai yun haule se meri jaanib
khana-e-dil mein usi pyar bhare khat ki tarah
hasrat-e-chashm meri tujh mein simat jati hai
zehn mein azm nigahon mein kai khwab liye
shakh-e-dil mein meri tu risti chali aati hai
rang aur nur faza ka bhi sanwar jata hai
mere jazbaat ko tu ishq sikha jati hai
kya kahun tujh ko main kya kah ke pukaron tujh ko
teri aankhon ka tasawwur tere galon ki mahak
jazba-e-ruh mein tufan utha jate hain
zehn-o-dil par likhe tarikh ke panne panne
teri chahat mein yunhi mitte chale jate hain
aatish-e-ishq se khulta hua kundan sa badan
khud-ba-khud naqsh hua jata hai jaan-o-dil par
khud-ba-khud panw nikal padte hain teri jaanib
baghban dil ko koi jaise ki mil jata hai
aur har samt faqat tu hi nazar aati hai
kya kahun tujh ko main kya kah ke pukaron tujh ko
kyun ye mahsus mujhe hota hai lamha lamha
meri duniya teri chahat ke siwa kuchh bhi nahin
aaj tu hi to hai dastur tasawwur ka mere
jaise duniya mein mera tere siwa koi nahin
meri shakhon pe tere nam ke gul khilte hain
mere patton mein tere rang hare bahte hain
aaj pairon mein thirakte hain tere naz-o-ada
mere naghmon ko tu pur-kaif bana deti hai
kya kahun tujh ko main kya kah ke pukaron tujh ko

kaun

kaun hai jo mujhe aaj chhu kar gaya
kis ka main baaton hi baaton mein ho gaya
meri angdaiyon ka sabab kaun hai
zehn kis khwab mein aaj kal kho gaya
kaun hai jo mujhe aaj chhu kar gaya
dhire se chupke se baat kis ki chali
kis ke lab pe achanak nazar tik gai
thahre thahre qadam kyun lage bhagne
kis ki baaton pe hum dil lage thamne
kaun hai jo mujhe aaj chhu kar gaya
meri aankhon mein taswir jis ki bani
sharm ki chadaron mein wo aa ke chhupi
aaj kuchh yun simatne lagi hai dagar
jaise manzil ne khud tai kiya ho safar
kaun hai jo mujhe aaj chhu kar gaya