tera aur mera sath

By

tera aur mera sath aalam-e-barzakh se hai
aalam-e-barzakh yani jahan arwah ek sath thin
main aur tum yani hum
wahan bhi ek sath the
phir mujhe aur tumhein ek sath
shayad tah-dar-tah ek sath sula diya gaya
yahan hamare liye man ki kokh ko garm kiya gaya
wahan main aur yahan tum ne ek hayule ki shakl li
farz karo chaalis din ka ek hafta ho aur tin hafton mein
hamara yani tumhaara aur mera nur ek nur ne us hayule mein phunk diya
tum puchhti ho kab se mohabbat hai
tum sochti ho kab se aashna hain
jaanan
hum duniya ki daryaft se pahle aashna hain
hamari arwah ne daryaft se pahle mohabbat ki thi
jism to ab mayassar hain
magar
hum kaenat ke wajud se pahle mil chuke hain

sota hun

By

bahut der ho gai
yun jagte jagte
aisa lagta hai jaise budha ho gaya hun
ya hum wo hain jinhen budha hi jana gaya
hath panw bhi jawab de rahen hain
thik se dikhai bhi nahin de raha
aankhen jaise dhundhiya gain hon
shayad
aansu hain
palkon ki dahliz bhi par nahin kar pa rahen
ab to jaane do
kuchh der ke liye so jaane do
jaane yun ki abhi kahin se
wo ek farishta mere taaqub mein aa nikle
thodi si nind puri kar lun
phir us ke sath bhi jaana hai

nazm

By

aaj bahut se lafz jo rah gae the
aur wo thithurte hue harf
jin ko yakja karna ba-mushkil tha
kuchh jazbaat jo dil ke
daman se lag kar sisak rahe the
sochon ka be-hangam hujum
jo dimagh ki hudud se musalsal takra raha tha
ehsasat jin ki kokh mein
udasi bechaargi past khali ne janm liya tha
un mein kai jazbe bhi the
jin ki dauran-e-hamal hi maut ho gai
kuchh tukde bhi the siyah-bakhti ke
kuchh rahzan bhi jo khayalat ki aabru
lut liya karte the
aaj un rahzanon ko suli par chadha diya gaya
insaf hua aur insaf ye hua ki
tum dur baithe dekh rahi thi bahut khamoshi
aur dilchaspi ka mojid bana khel khel ke liye
aaj in sab lafzon harufon ehsasat
jazbaat aur sochon ko
tere khayal se ghusl diya
araq-e-gulab jo teri suji aankhon
se bah raha tha
is araq ko lashe par chhidakte hue
aaj unhen dafna diya gaya

zaitun ki TuTi shaKH

By

in meri jawan
ungliyon se raste jate hain
mere budhe lambe sal
main tanhai ki
thandi sil par baitha hun
aur rota hun
main azal abad ka andha musafir
chalta hun
main apne qadmon se niklun
mujhe rasta do
sab chehre mere apne hain
go kale hain
sayon ke taaqub mein
mere panw mein chhaale hain
is hashr-ba-daman duniya mein
mujhe shakti do

do aalam

By

ek bharpur mukammal pan
yak jaani ghusl aur nashta
dhobi dhule hue kapde be polish boot
sadken aabaadi tanhai
khabren sher aawazen rang
masafat sabza ped pahad aur pani
nange pair aur sath ki hairani dil ki gahrai
tanhai ka sukun aur
tanhai ki wahshat
ek bharpur mukammal pan
yak-jaani yaktai
raat ka khana sair
aur hat mein hat
aur waqt ki tezi
sine sile hue
khunki mein hiddat
garmi mein kuchh aur bhi achchhi hiddat
khwab bahao sara aalam
jagte jagte sona sote sote
jagte rahna yak tai yak jaani
pani dariya pani gahra sabz samundar
jis mein tan duben tanhai nikle
shah-e-rag se nazdik ragon mein rawan
sine ki sans lahu ki surkhi
aankh ki binai yak tai
yak jaani bharpur mukammal-pan
tanhai
tanhai

KHwab-e-haqiqat

By

pani aurat aur ghalazat
aksar khwabon mein aate hain
mujh ko pareshan kar jate hain
aurat ek hayula surat
kabhi ajanta ki wo murat
kabhi kabhi japani gudiya
kabhi wo ek sagar shahzadi
aab-e-rawan ke dosh pe leti
maujon ke halkore khati
sanp ki aankhon mein angara
us ki har phunkar mein wahshat
apne har andaz mein dahshat
kabhi wo mujh par hamle karta
kabhi main us ke sar ko kuchalta
dhan ke khet mein thahra pani
dariyaon mein bahta pani
lahraata bal khata pani
tughyani mein bhanwar banata
sailabon mein shor machata
ghazab mein phailta badhta pani
kodon ke dheron ke jaisa
unche niche tilon jaisa
milon ke raqbe mein phaila
dekhta hun insani fuzla
kabhi to main pata hun khud ko
apni ghalazat mein hi luthda
kabhi main apne hathon se hi
ghar se bahar phenkta dekhun
apne ghar walon ka fuzla
kabhi kamod mein tairta dekhun
kabhi to mez pe khane ki hi
kabhi kisi duje kamre mein
aksar apne kamre mein bhi
apne bistar par hi dekhun
ya phir
dur khalaon ke aangan se
apne ghar mein ghusta dekhun
khwabon ka asrar hai kaisa
khwabon ki lazzat hai kaisi
jin mein jakda
sochta hun main
waqai ye sab khwab hain yawar
khwab-numa koi bedari
ya be-manzil rasta koi
ya phir ek tilism hai koi
ek din phir aisa hota hai
sanp aurat ko das leta hai
pani mein ghalazat mil jati hai
ab bas sanp hai aur ghalazat
par ye shayad khwab nahin