flodniDedan

By

teri khamosh-mohabbat ko na samjha koi
be-zabani teri izhaar bani thi jis ka
tere jazbaat tere ehsasat
kabhi shadabi se teri kabhi kumlahat se
aashkara the magar koi na samjha teri baat
zindagi bhi teri poshida thi insanon se
phir bhi kuchh logon ne daulat ke liye nal samajh kar tujh se
drawing-room apne saja rakkhe hain
martabanon mein tawajjoh se lagaya hai tujhe
kitni yak-tarfa rahi hai teri chah
lekin is daur mein kuchh log zaban-dan hain tere
mil gaya hai teri khamosh mohabbat ko jawab
der hi se sahi insan ka dil jaga hai
aaj bhi ranj mein rahat mein hai tu us ki sharik
us ka gham rakhta hai afsurda tujhe
aur khushiyan tujhe sarsabz bana deti hain
lekin ab bhi bahut aise hain nahin jin ko khabar
un pe jo bitti hai tujh pe guzar jati hai
ras be-mehri-e-insan tujhe kab aati hai
ranj ki aanch se tu sukh ke rah jati hai

ai mere KHwab

ai mere khwab
hunar-khez riwayat ke amin
inkishafat ki daryuza-gari chhod bhi de
gard-e-hangam mein tartib se rakh
aankh ki khasta fasilon se gire khisht-mizaj
un chune zard gulon se dhake kuchh sokhta pal
samt ka koi tayyun to nazar mein thahre
ai mere khwab
mere sath na chal
mujhe darpesh hai la-samt samaj
ek virani tamashe mein gundhi
ye tamasha nahin paband-e-charagh
gard ne rakht-e-safar aankh ka chhal
ghar kahan hai koi ghar mein thahre
ai mere khwab
minaron pe parinde utre
jaane kis khauf se jangal se palat aae hain
dar hai ye surkh aqiqon ko nigal jaenge
sansanati hui tanhai mein ghir jaenge
un ko darpesh hai ab hijr ka thal
is kharabe mein bhala kaun safar mein thahre

mujhe tum se mohabbat hai

By

khuda kahta hai bandon se
mujhe tum se mohabbat hai
tumhaari shah-e-rag se bhi
main ziyaada pas rahta hun
tumhein main kaise samjhaun
mujhe tum se mohabbat hai
main dun tum ko misal aisi
jise tum sun ke barjasta
kaho aamanna saddaqna
suno
hai kaun si hasti
jo tum ko jaan se pyari hai
ki jis ki zist ka pal pal
tumhein pe wari wari hai
dua karte hue shab shab
sada jis ne guzari hai
ye sach hai wo to man hi hai
bas itna jaan lo logo
ki us man se kahin ziyaada
mujhe tum se mohabbat hai

tahayyur ishq

By

ba-mushkil ek hairani ko
aankhon se nikala tha
ki phir ek aur hairani
ye basti kaisi basti hai jahan par
mera har ek khwab
hairani ki ek chadar ko odh
so raha hai
aur tahayyur ki qaba pahne hue hain
ashk sare
aur yahan tak ki hamare ishq ne bhi
hijr ke ek sang par jo lafz likkha hai
wo hairat hai
wahi ek lafz jo ab mere dil ke
aaine se barsar-e-paikar hai
aur kaun jaane
aaina baqi rahega
ya hamare ishq ki hairat

sawal

By

mohabbat aashna lamhe
chhupae ek ajab sa
karb lahje mein
mujhi se puchhte hain ye
agar har khwab ki qismat mein
mar jaana hi likkha hai
to aankhen dekhti kyun hain