chaar su intishaar hai kya hai
ye khizan hai bahaar hai kya hai

sab ko mashkuk tum samajhte ho
khud pe bhi e'tibar hai kya hai

sawa neze pe chahiye suraj
jism mein barf-zar he kya hai

mujh ko manzil nazar nahin aati
dur tak rahguzar hai kya hai

koi aahat talak nahin hoti
mere andar mazar hai kya hai

ek pal bhi nahin mera apna
zindagani udhaar hai kya hai

mere hamdam zara bata mujh ko
ye jawani khumar hai kya hai

hai jo mujh se 'asad' gurezan sa
maslahat ka shikar hai kya hai