hum ne jab chaha koi aag bujhane aae
aae to log magar dil ko jalane aae

kuchh asar hota nahin bazm-e-tarab ka dil par
dard ka git koi aaj sunane aae

ras jab aa na saka shahr-e-khirad ka mahaul
wusat-e-dasht-o-bayaban mein diwane aae

bhagi jati hai ye duniya nai raunaq ki taraf
shahr hai ujda hua kaun basane aae

aaj tak jin ko nahin rah-e-sadaqat ki khabar
haqq-o-baatil ka wahi farq batane aae

kyun kisi ghair pe ilzam main rakhta 'anjum'
mere apne wo sabhi the jo rulane aae