na hote shad aain-e-gulistan dekhne wale
fasana bhi agar padh lete unwan dekhne wale

halakat-khez ijadon pe duniya fakhr karti hai
kahan hain irtiqa-e-nau-e-insan dekhne wale

jo mumkin ho tum apne hath ki rekha khurach dalo
ki hum hain to sahi khwab-e-pareshan dekhne wale

ye rakhne hain ye dar hain ye tere ajdad ke sar hain
idhar aa katba-e-diwar-e-zindan dekhne wale

tulu-e-aftab-e-agahi kya khak dekhenge
hiqarat se mera chaak-e-gareban dekhne wale

to phir kaisi nazar-bandi tilsimat-e-tadabbur kya
jo khud ko dekh len jashn-e-charaghan dekhne wale

shikast-e-zauq-e-nazzara muqaddar hi sahi 'ghausi'
unhen dekhenge phir bhi ta-ba-imkan dekhne wale