aa gaya phir ramazan kya hoga
hae ai pir-e-mughan kya hoga

bagh-e-jannat mein saman kya hoga
tu nahin jab to wahan kya hoga

khush wo hota hai mere nalon se
aur andaz-e-fughan kya hoga

dur ki rah hai saman hain bade
itni mohlat hai kahan kya hoga

dekh lo rang-e-paridan ko mere
dil jalega to dhuan kya hoga

hoga bas ek nigah mein jo tamam
wo ba-hasrat nigaran kya hoga

hum ne mana ki mila mulk-e-jahan
na rahe hum to jahan kya hoga

mar ke jab khak mein milna thahra
phir ye turbat ka nishan kya hoga

jis tarah dil hua tukde az-khud
chaak is tarah katan kya hoga

ya tera zikr hai ya nam tera
aur phir wird-e-zaban kya hoga

ishq se baz na aana 'haidar'
raaz hone de ayan kya hoga