aankh be-qabu hai duniya ki tarah
dil hai pahlu mein tamanna ki tarah

koi aawaz koi gunj nahin
waqt chup-chap hai sahra ki tarah

tu hai ek phailti badhti khushbu
main hun ek shoala-e-tanha ki tarah

tu meri rah mein kyun hail hai
ek umde hue dariya ki tarah

mujh ko malum nahin tha ai dost
tu bhi begana hai duniya ki tarah

dur ufuq-par hai shab pichhle-pahar
koi ubhra rukh-e-zeba ki tarah

shahr mein chandni ban kar utra
chha gaya nashsha-e-sahba ki tarah

bas tere rang-e-haya ki manind
hu-ba-hu tere sarapa ki tarah

ab kahan paunga main naqsh-e-'jamil'
dhundhta phirta hun dariya ki tarah