aankhen gham-e-firaq se hain tar idhar-udhar
gham ka asar hai aaj barabar idhar-udhar

the jo wafa-shiar wo nazr-e-sitam hue
ab kis ko dhundhta hai sitamgar idhar-udhar

mahfil mein tere husn pe qurban hoga kaun
diwane chal diye jo nikal kar idhar-udhar

saqi ke sath raunaq-e-mai-khana bhi gai
tute pade hain shisha-o-saghar idhar-udhar

aisa na ho zamana hanse tum par ek din
likkho na mere haal pe hans kar idhar-udhar

dil mein kabhi hai dard jigar mein kabhi khalish
jaise chhupe hon sine mein nashtar idhar-udhar

apni ghazal sunao 'shamim' ahl-e-zauq ko
zaea karo na fikr ke jauhar idhar-udhar