aasman aatish-e-zulmat mein jal jae to
khanda-e-subh ki taswir badal jae to

ab to aaram qayamat pe hua hai mauquf
aur ye aakhiri ummid bhi tal jae to

aks aaine mein aur aks mein rup us ka hai
kabhi ye aaina aankhon se badal jae to

ye jo dam sadh ke baithe hain use dekhne ko
pattharon ki bhi kahin aah nikal jae to

hum se aawara-e-ghurbat se mohabbat na karo
kya ho jo ret ye mutthi se nikal jae to