ahd-o-paiman kar ke paimane ke sath
umr guzri tere maikhane ke sath

zindagi bhi ji chura kar rah gai
kaun marta tere diwane ke sath

ye na puchho rah-nawardan-e-haram
kaun chhuta hum se but-khane ke sath

khud-bakhud hal ho gae kitne sawal
waqt ke khamosh afsane ke sath

ai faqih-e-shahr kya is ka ilaj
chashm-e-saqi bhi hai paimane ke sath

hosh-mandon par garan hain ai 'rawish'
un ki baaten tujh se diwane ke sath