ajab nahin ki zamin panw se sarak jae
hamare sar pe kai din se aasman bhi nahin

sharif rah ke guzari gai jawani ka
agarche faeda kam hai magar ziyan bhi nahin

use qarib se dekhe hue zamana hua
suna hai dekhne walon se ab jawan bhi nahin

main koi der ko aaya hun is kharabe mein
meri nashist nahin hai mera makan bhi nahin

'waqas' le ke kahan jae apni ghurbat ko
ki is liye to koi dusra jahan bhi nahin