aks ghatte badhte hain shishagari hai ek si
soch ke adse juda hain raushni hai ek si

zindagi karte hain insan mukhtalif andaz mein
go ki sab ki dastaras mein zindagi hai ek si

doston aur dushmanon mein kis tarah tafriq ho
doston aur dushmanon ki be-rukhi hai ek si

soch ka mafluj hona sanehe se kam nahin
an-ginat shaer hain lekin shaeri hai ek si

sab dilon mein ja-guzin hain gham ke qisse ek se
sab jabinon par raqam be-raunaqi hai ek si

'jaan' ye sabit hua hai tajrabe ki aanch par
dushmani hai sau tarah ki dosti hai ek si