andhere dhundne nikle khandar kyun
khuda jaane hue ye dar-ba-dar kyun

ye bu ujde hue bazar ki hai
meri basti hui na-mo'tabar kyun

samaat munjamid si ho rahi hai
magar shoala-bayani par asar kyun

agar ehsas hi hairat-zada hai
to kandhe par liye phirte ho sar kyun

ye bojhal sham ka dhundla tasawwur
mere ehsas par chhaya magar kyun

mizaj-e-shahr mein tabdiliyan hain
mere tewar badalte dekh kar kyun

jahan patthar tarashe ja rahe hon
wahan khema lagaen shishagar kyun

khala se dekhna hai 'rind' duniya
to phir thahrun purane chand par kyun