anjuman mein jo meri itni ziya hai sahab
khun-e-dil mere charaghon ki ghiza hai sahab

but-shikan nikla wahi samjha tha jis ko but-gar
jis mein rahta tha wahi tod gaya hai sahab

aankh se aansu chura le gaya lekin wo shakhs
be-guhar sip yahin chhod gaya hai sahab

mujh ko jannat ke nazare bhi nahin jachte hain
shahr-e-jaanan hi tasawwur mein basa hai sahab

regzaron ke safar pe jo chale ho 'alok'
koi aankhon mein liye ashk khada hai sahab