apne anjam se be-khabar zindagi
raat din kar rahi hai safar zindagi

in dahakti chitaon ki aaghosh mein
kis tarah ho sakegi basar zindagi

aa ke jate hue manzaron ki tarah
ghatti jati hai sham-o-sahar zindagi

maut tera bahut hum pe ehsan hai
tujh se pahli na thi mo'atabar zindagi

bughz-o-nafrat ki badhti hui aag mein
jal rahe hain umidon ke ghar zindagi

chhod kar is qafas ko kidhar jaenge
ho gai ab to be-baal-o-par zindagi

hum bhi 'sailani' bhatka kiye umr bhar
le gai jab idhar se udhar zindagi