ba-har-lamha pighalta ja raha hun
nae sanche mein dhalta ja raha hun

meri manzil mere pesh-e-nazar hai
magar raste badalta ja raha hun

mere ashaar mera aaina hai
main apna fan ugalta ja raha hun

koi surat nikalo zindagi ki
ki ab gham se bahalta ja raha hun

safar to zindagi ki shart thahra
na chalne par bhi chalta ja raha hun

sahaara de rahi hain laghzishen ab
ki 'jami' main sambhalta ja raha hun