badi choron ko aasani hai mujh mein
kisi andhe ki nigarani hai mujh mein

meri aankhon se bahar jhankta hai
na-jaane kaun zindani hai mujh mein

dil-e-afsurda ne wo gul khilae
jahan tak dekhun virani hai mujh mein

bahut bechain rahti hai meri ruh
use koi pareshani hai mujh mein

khula ye raaz chashm-e-tar se mujh par
samundar se fuzun pani hai mujh mein

khuda ko aazmaun lamha lamha
badi kafir musalmani hai mujh mein