chand taron ne bhi jab rakht-e-safar khola hai
hum ne har subh ek ummid pe dar khola hai

main bhatakta raha sadkon pe teri basti mein
kab kisi ne meri khatir koi ghar khola hai

ho gai aur bhi rangin teri yaadon ki bahaar
khilte phulon ne mera zakhm-e-jigar khola hai

un ki palkon se gire tut ke kuchh taj-mahal
nind se chaunk ke jab dida-e-tar khola hai

yar mera to muqaddar hai wo chadar jis ne
panw khole hain kabhi aur kabhi sar khola hai

raat bhaari kati shayad gae din laut aae
shams' ne parcham-e-ummid-e-sahar khola hai