chhoda na mujhe dil ne meri jaan kahin ka
dil hai ki nahin manta nadan kahin ka

jaen to kahan jaen isi soch mein gum hain
khwahish hai kahin ki to hai arman kahin ka

hum hijr ke maron ko kahin chain kahan hai
mausam nahin jachta hamein ek aan kahin ka

is shokhi-e-guftar par aata hai bahut pyar
jab pyar se kahte hain wo shaitan kahin ka

ye wasl ki rut hai ki judai ka hai mausam
ye gulshan-e-dil hai ki bayaban kahin ka

kar de na ise gharq koi naddi kahin ki
khud ko jo samajh baitha hai bhagwan kahin ka

ek harf bhi tahrif-zada ho to dikhae
le aae utha kar koi quran kahin ka

mahbub nagar ho ki ghazal gano ho 'raghib'
dastur-e-mohabbat nahin aasan kahin ka