dam phailae hue hirs-o-hawa hain kitne
ek banda hai magar us ke khuda hain kitne

ek ek zarre mein poshida hain kitne khurshid
ek ek qatre mein tufan bapa hain kitne

chand hanste hue phulon ka chaman nam nahin
ghaur se dekh ki pamal-e-saba hain kitne

un se na-karda jafaon ka kiya tha israr
utni hi baat pe wo hum se khafa hain kitne

gamzan ho ke ye uqda to khula hai 'raushan'
rahzan kitne hain aur rah-numa hain kitne