dil-e-dard-ashna ka muddaa kya
kisi bedad ki kije dawa kya

hua insan hi jab insan ka dushman
shikayat phir kisi ki kya gila kya

bahaar-e-taza aai gulsitan mein
khilae jaane gul baad-e-saba kya

wo kahte hain nasheman tark kije
chali gulshan mein ye taza hawa kya

uthi insaniyat yaksar yahan se
yakayak khu-e-insan ko hua kya

nahin malum mustaqbil kisi ko
marahil pesh aaen jaane kya kya

ujad kar rah gaya do din mein he he
mere 'gulzar'-e-hindi ko hua kya