dil ke zakhm dikhaen kya
aaina ban jaen kya

laut ke buddhu ghar ko aae
hum bhi wapas aaen kya

chaak-gareban ghumen kyon hum
diwane kahlaen kya

sari wirasat bech chuke hain
ek zamir bachaen kya

phir thokar mein duniya hogi
phir kambal phailaen kya

ham-sae ke ghar mein faqa
kha-pi kar so jaen kya

sari duniya raushan karne
dil ke dagh jalaen kya

'nazr' ki parda-dari samjho
ab nange ho jaen kya