dil-ruba pahlu se ab uth kar juda hone ko hai
kya ghazab hai kya qayamat hai ye kya hone ko hai

dushmani-e-khalq meri rahnuma hone ko hai
ab mera dast-e-talab dast-e-dua hone ko hai

tu ne chaha tha bura mera bhala hone ko hai
aab-e-khanjar halq mein aab-e-baqa hone ko hai

aaj to ji bhar ke pi lene de ai saqi mujhe
jaan hi jati rahegi aur kya hone ko hai

ai dil-e-pur-arzu kar de sar-e-taslim kham
dekh kin hathon se khun-e-muddaa hone ko hai

shokh-raftari ka apni dekh to mud kar asar
sath sath uth kar rawan har naqsh-e-pa hone ko hai