dil se jis ko chahta hun kyun use ruswa karun

dil se jis ko chahta hun kyun use ruswa karun
ye mera shewa nahin main ishq ka charcha karun
ehtiyatan is liye tanha raha karta hun main
yaad wo aa jae to ji khol kar roya karun
khat mera padh kar sitamgar kyun na hoga ashk-bar
aah ka le kar qalam jab dard ko insha karun
tu chale hamrah to rasta dikhai de mujhe
kyun abas parchhaiyon ke ghul ka pichha karun
dil mein ek masum si ye aarzu bhi hai 'sahar'
wo mukhatab mujh se ho aur main use dekha karun