diye jalenge to phir raushni to hogi nan
class-fellow hain hum dosti to hogi nan

nazar jhukae yunhi pas se nahin guzra
fareb-kar ko sharmindagi to hogi nan

ye mera faiz nahin khanwade ka hai mizaj
so mere chaaron taraf raushni to hogi nan

hamare jeb-tarashon ke husn-e-zan ko salam
ki zar hua na hua shairi to hogi nan

kabhi jo aankhon se karte the aaj kahna padin
hamari baaton mein be-rabtagi to hogi nan

parinde apne thikanon pe ud ke ja chuke hain
hamare nan-o-namak mein kami to hogi nan