do chaar gam rah ko hamwar dekhna
phir har qadam pe ek nai diwar dekhna

aankhon ki raushni se hai har sang aaina
har aaine mein khud ko gunahgar dekhna

har aadmi mein hote hain das bis aadmi
jis ko bhi dekhna ho kai bar dekhna

maidan ki haar jit to qismat ki baat hai
tuti hai kis ke hath mein talwar dekhna

dariya ke is kinare sitare bhi phul bhi
dariya chadha hua ho to us par dekhna

achchhi nahin hai shahr ke raston se dosti
aangan mein phail jae na bazar dekhna