dubone walon ko sharminda kar chuka hunga
main dub kar hi sahi par utar chuka hunga

pahunch to jaunga aab-e-hayat tak lekin
zaban bhigone se pahle hi mar chuka hunga

sunai jaegi jab tak mujhe saza-e-sukhan
sukut-e-waqt mein aawaz bhar chuka hunga

misal-e-reg hun mein saaton ki mutthi mein
wo jab tak aaega sara bikhar chuka hunga

zamana aaega us waqt khair-maqdam ko
jab is jahan se 'muzaffar' guzar chuka hunga