ek naya waqia ishq mein kya ho gaya
dil mein kahin phir koi zakhm hara ho gaya

bazm-e-tarab bhi saji mahfil-e-gham bhi saji
kaun mila tha mujhe kaun juda ho gaya

apni khushi se mujhe teri khushi thi aziz
tu bhi magar jaane kyun mujh se khafa ho gaya

main to nahin mangta is ke siwa kuchh sila
teri nazar ho gai mera bhala ho gaya

badhne lagi khamushi darne lagi zindagi
dil hi mera dafatan naghma-sara ho gaya