guhar ko jauhari sarraf zar ko dekhte hain
bashar ke hain jo mubassir bashar ko dekhte hain

na khub o zisht na aib-o-hunar ko dekhte hain
ye chiz kya hai bashar hum bashar ko dekhte hain

wo dekhen bazm mein pahle kidhar ko dekhte hain
mohabbat aaj tere hum asar ko dekhte hain

wo apni burrish-e-tegh-e-nazar ko dekhte hain
hum un ko dekhte hain aur jigar ko dekhte hain

jab apne girya o soz-e-jigar ko dekhte hain
sulagti aag mein hum khushk-o-tar ko dekhte hain

rafiq jab mere zakhm-e-jigar ko dekhte hain
to chaaragar unhen wo chaaragar ko dekhte hain

na tumtaraq ko ne karr-o-farr ko dekhte hain
hum aadmi ke sifat o siyar ko dekhte hain

jo raat khwab mein us fitnagar ko dekhte hain
na puchh hum jo qayamat sahar ko dekhte hain

wo roz hum ko guzarta hai jaise id ka din
kabhi jo shakl tumhaari sahar ko dekhte hain

jahan ke aainon se dil ka aaina hai juda
is aaine mein hum aaina-gar ko dekhte hain

bana ke aaina dekhe hai pahle aaina-gar
hunar-war apne hi aib-o-hunar ko dekhte hain