gulon pe shabnam nahin lahu hai
ye kaisi saughat-e-rang-o-bu hai

bahaar khanjar-ba-dast aai
har ek manzar lahu lahu hai

koi tamanna nahin hai mujh ko
sukun-e-dil ki hi aarzu hai

main ek muddat se lapata hun
mujhe khud apni hi justuju hai

ye be-dili ki namaz teri
guman hota hai be-wuzu hai

is ko aksar main sochta hun
meri ghazal ki jo aabru hai

mera nahin hai 'asad' ye chehra
to kaun shishe mein ru-ba-ru hai