gum is qadar hue aaina-e-jamal mein hum
usi ko dhundte hain us ke khadd-o-khal mein hum

jawaz-e-sust-khirami talash karte hain
kis ehtimam se raftar-e-mah-o-sal mein hum

zamane hum teri har kaj-rawi ko jaante hain
isi liye kabhi aae na teri chaal mein hum

jahan pe tujh se bichhadna bahut zaruri tha
usi jagah pe khade hain tere khayal mein hum

tayyun-e-safar-o-samt se hain begana
chale junub ko the aa gae shumal mein hum

shikasta aaina hain hum ko reza reza utha
ki chur chur hue dil ki dekh-bhaal mein hum