guzishta shab hama-auqat gharq-e-jam rahe
kabhi khuda se kabhi us se ham-kalam rahe

dua-e-akhir-e-shab mein usi ko manga hai
jo qatl-e-harf-e-tamanna pe shad-kaam rahe

kabhi jo aai bhi takmil-e-arzu ki ghadi
jo na-tamam the qisse wo na-tamam rahe

diye saje rahen palkon pe dil sulagta rahe
wo aae ya ki na aae ye iltizam rahe

lahu lahu dil-o-jaan hon par apne qatil ka
'shamim' kuchh bhi ho malhuz ehtiram rahe