hamein yaad aawti hain baaten us gul-ru ki rah rah ke
nahin hain bagh mein mushtaq hum bulbul ke chah chah ke

karega qatl kis ko dekhiye wo tegh-zan yaro
chala aata hai apne hath mein qabze ko gah gah ke

nasha aisa hua us ki nigah ka jo nahin thamte
hamare ashk jate hain chale chashmon se bah bah ke

hum us ka muskurana yaad kar ro ro ke hanste hain
nahin mushtaq ab bazar ke khandon ke qah-qah ke

sukhan mein fakhr apna bin kiye rahta nahin 'naji'
use samjhae 'hatim' kis tarah ashaar kah kah ke