han mujhe gawara hai ishq ka safar tanha
us ne mujh ko chhoda hai kuchh to soch kar tanha

zist hai magar suni ishq hai magar tanha
chashm sar-basar viran qalb sar-basar tanha

wo jamal ki tabish jaise nur ki barish
husn-e-yar ki yurish aur meri nazar tanha

dil ki ek ek hasrat chhod kar hui rukhsat
hae-re ye sannata hae-re ye ghar tanha

kya qayamaten yaro husn ke jilau mein thin
hum ne dur tak dekha ishq tha magar tanha

thokaren hi khaunga gir ke uth na paunga
manzil-e-mohabbat mein main chala agar tanha

daman-e-mohabbat par dil ka khun bhi hoga
tera gham manaegi kaise chashm-e-tar tanha