har aankh mein masti hai kahiye bhi to kya kahiye
aur aap ki basti hai kahiye bhi to kya kahiye

har shai se kinara bhi aur anjuman-ara bhi
kya aap ki hasti hai kahiye bhi to kya kahiye

but-khane mein din kata maikhane mein shab guzri
nasha hai na masti hai kahiye bhi to kya kahiye

ye daur sanam-parwar har shakhs yahan aazar
sahra hai na basti hai kahiye bhi to kya kahiye

wo mahfil-e-rindan ho ya bazm-e-sukhan-dan ho
ahbab-parasti hai kahiye bhi to kya kahiye

zahid ki subuk-fitrat rindon pe hamesha se
aawaz hi kasti kahiye bhi to kya kahiye

ahbab ki aankhon mein jo uns ki nagin hai
ahbab ko dasti hai kahiye bhi to kya kahiye

ek jins-e-kudurat thi jo pahle hi sasti thi
ab aur bhi sasti hai kahiye bhi to kya kahiye

duniya se 'aziz' us ko hoti hai mohabbat bhi
duniya jise dasti hai kahiye bhi to kya kahiye