har-chand husn-saz hun paikar-tarash hun
lekin khad aaine ki tarah pash pash hun

dil hi ki dhadkanon se thi raftar-e-zindagi
jab dil hi mar chuka hai to phir zinda lash hun

aathon pahar sukun mayassar nahin mujhe
har lamha jo kasakti rahe wo kharash hun

taswir-e-ahd-e-nau hai mujassam mera wajud
aalam-e-rozgar hun fikr-e-maash hun

mere junun-e-shauq ki manzil nahin koi
yani rah-e-talab mein sarapa talash hun

'wahid' koi bhi us ki na tashkhis kar saka
wo kaun sa maraz hai jo sahab-farash hun