har tamanna dil se rukhsat ho gai
lijiye fursat hi fursat ho gai

kaun samjhae dar-o-diwar ko
jin ko tere did ki lat ho gai

hum nahin ab barishon ke muntazir
ab hamein sahra ki aadat ho gai

sarhadon ki bastiyon sa dil hua
wahshaton ki jin ko aadat ho gai

sahilon par kya gharondon ka wajud
tutna hi in ki qismat ho gai

rahaton ki bhi talab baqi nahin
dard se aise mohabbat ho gai