hasin yaadon se khalwat anjuman hai
khamoshi naghma-zar-e-sad-sukhan hai

nigar-e-gul-badan gul-pairahan hai
dhanak raqsan chaman-andar-chaman hai

meri diwangi par hansne walo
yahan farzangi diwana-pan hai

mubarak rah-raw-e-rah-e-tamanna
watan ghurbat mein hai ghurbat watan hai

dara sakte nahin khunin andhere
nigah-e-be-dilan zulmat-shikan hai

khushi arzan hai bazar-e-jahan mein
baha-e-gham mata-e-jaan-o-tan hai

azal se 'wajd' har qatre ke dil mein
qayamat-khez tufan maujzan hai