hum kar chuke jab nur se tamir khuda ki
phir chaaron taraf khub ki tashhir khuda ki

duniya hui aabaad magar wo raha tanha
majbur hai kya kijiye taqdir khuda ki

dekhe na sune baat jo ushshaq ki apne
is but mein nazar aati hai taswir khuda ki

mulla ne riwayat-o-hikayat badhain
tafsir mein gum ho gai tahrir khuda ki

yak-jaan hue aadam-o-iblis ke aage
aksar nahin chalti koi tadbir khuda ki