hum tashakhkhus kho rahe hain zat ki tashhir mein
khud bikharte ja rahe hain koshish-e-tamir mein

ye bhi sochen kash izzat kya hai aur zillat hai kya
wo jo ruswa ho rahe hain hasrat-e-tauqir mein

aaj nakhl-e-maslahat ki chhanw mein hai mahw-e-khwab
parwarish jis ki hui thi saya-e-shamshir mein

ai sukhnawar tum jo kahte ho wo kyun karte nahin
kyun ham-ahangi nahin kirdar aur tahrir mein

us ki subhen dil-kusha hain us ki shamen jaan-fiza
kho gaya jo shakhs lutf-e-nala-e-shab-gir mein

ho ata jis shakhs ko nur-e-basirat ai 'jalal'
dekh leta hai musawwir ko bhi wo taswir mein