husn paband-e-hina ho jaise ye wafaon ka sila ho jaise yun wo karte hain kinara mujh se is mein mera hi bhala ho jaise tana dete hain mujhe jine ka zindagi meri khata ho jaise is tarah aankh se tapka hai lahu shakh se phul gira ho jaise sar-e-kohsar wo baadal garja dil dhadakne ki sada ho jaise haal-e-dil puchhte ho yun mujh se tum mere dil se juda ho jaise yaad yun aai teri ruk ruk kar koi zanjir-ba-pa ho jaise ab jafa ko bhi taraste hain 'raza' yahi tasir-e-dua ho jaise