is dasht-e-sukhan mein koi kya phul khilae
chamki jo zara dhup to jalne lage sae

suraj ke ujale mein charaghan nahin mumkin
suraj ko bujha do ki zamin jashn manae

mahtab ka partaw bhi sitaron pe giran hai
baithe hain shab-e-tar se ummid lagae

har mauj-e-hawa shama ke dar pai hai azal se
dil se kaho lau apni zara aur badhae

kis kucha-e-tiflan mein chale aae ho 'shair'
aawaza kase hai to koi sang uthae