ishq ki mere jo shohrat ho gai
yar se mujh ko nadamat ho gai

khak arz-e-muddaa us se karun
jis ko baaton mein kudurat ho gai

yan se jaane ko hain wo aachuk kahin
kya bala ai abr-e-rahmat ho gai

ab sitam aghyar par karne lage
mere mar jaane se ibrat ho gai

jalwa-e-mani nazar aane laga
pite pite mai ye surat ho gai

un ki baaten us ne bhi chhup kar sunin
aaj naseh ko nasihat ho gai

mana-e-wasl-e-ghair par hans kar kaha
bare ab tum ko bhi ghairat ho gai

bu-e-gul us gul ki bu ke ru-ba-ru
fil-haqiqat be-haqiqat ho gai

bas na farmate phiro ye 'shefta'
go unhen tum se mohabbat ho gai