jaane kis mod par main ne dekha nahin
mud gaya ham-safar main ne dekha nahin

tum ko malum ho to batana mujhe
rah gai main kidhar main ne dekha nahin

waqt ki sidhiyan chadhte dekha use
wo gaya phir kidhar main ne dekha nahin

le ke aaya tha mere liye raushni
jab gaya chhod kar main ne dekha nahin

mil hi jati kabhi koi manzil mujhe
ek qadam laut kar main ne dekha nahin

tum gae sath us ke jidhar bhi kahin
tum samajhna udhar main ne dekha nahin

pyar hai kis qadar us ko mujh se 'shabi'
chudiyan tod kar main ne dekha nahin